लखनउ, १० भदौं । भारत उत्तर प्रदेशको शाहजहाँपुरमा भएको सवारी दुर्घटनामा परी कम्तीमा १६ जनाको मृत्यु भएको छ । ट्रकले टेम्पोलाई ठक्कर दिएपछि सडक किनारमा रोकेर राखिएको यात्रुवाहक भ्यानमाथि बजारिएको थियो ।

दुर्घटनामा अरु पाँच जना घाइते भएको जनाइएको छ । दुर्घटनापछि ट्रक चालक फरार रहेको भारतीय सञ्चारमाध्यमले जनाएका छन् ।

लखनउ–दिल्ली राजमार्गअन्तर्गत शाहजहाँपुर नजिक तीब्र गतिमा खाली ट्रक दौडिरहेको थियो । सोही बेला ट्रकका अगाडि एक्कासी यात्रुवाहक टेम्पे आइपुग्यो । ट्रकले ब्रेक लगाउन प्रयास गरेपछि ट्रकको नियन्त्रण गुम्न पुग्यो । त्यसलगत्तै ट्रक टेम्पोमा ठोक्कियो र नजिकै रोकिरहेको यात्रुवाहक भ्यानमा बजारिन पुग्यो ।

उत्तर प्रदेशका मुख्यमन्त्री योगी आदित्यनाथले घटनाप्रति दुःख व्यक्त गरेका छन् । उनले पीडितलाई उचित क्षतिपूर्तिको व्यवस्था गर्नसमेत निर्देशन दिएका छन् ।