जनकपुरधाम, १३ भदौं । प्रदेश २ को चार जिल्लाबाट लागूऔषधसहित सात जना पक्राउ परेका छन् ।

सप्तरीको बोदे बर्साइन नगरपालिका ६ फुलकाहीस्थित खमगाढा चोकबाट सोही नगरपालिका ८ काचन निवासी ३५ बर्षीय शत्रुद्यन रामलाई फेर्नागन र डाइजिलाप एम्पुल ५/५ सयका दरले तथा नोफिन ४ सय ९८ थान एम्पुलसहित पक्राउ गरिएको सप्तरी प्रहरीले जनाएको छ ।

सिरहा प्रहरीले खैरो हिरोइनसहित गोलबजार नगरपालिका ६ दोहोटिया निवासी २१ वर्षीय भरत पासवान र २२ वर्षीय वीरेन्द्र यादवलाई पक्राउ गरेको छ । स ५ प ५०९४ नम्बरको मोटरसाइकलमा सवार पासवान र यादवलाई आठ ग्राम खैरो हेरोइनसहित पक्राउ गरेको छ ।

यस्तै, धनुषाको गणेशमान चारनाथ नगरपालिका १० बस्ने २५ बर्षीय सुवास कुमार यादवलाई नाईट्रोभ्याट २४० ट्याबलेट, स्पामो प्रोक्सिभन ३२ क्याप्सुल, कोरेक्स ३ बोतल र सिरिञ्ज १ थानसहित जनकपुर उप–महानगरपालिका २ जल्हाद पुल नजिकैबाट पक्राउ गरिएको छ । चेकजाँच गर्दा निजको साथबाट लागूऔषध बरामद भएको र उनीबिरुद्व थप अनुसन्धान भइरहेको प्रहरीले जनाएको छ ।

पर्सामा एक महिलासहित तीन जना लागूऔषधसहित पक्राउ परेका छन् । पर्साको पर्सागढी नगरपालिका वडा नं १ निवासी तारादेवी पासवान, भारत बिहारको मोतिहारी निवासी धर्मेन्द्र साह कानु र पिन्टु पासवान पक्राउ परेका हुन् ।

पर्साबाट भारततर्फ लैजाँदै गरेको चार किलो गाँजासहित तारादेवीलाई र वीरगञ्जको रजतजयन्ती चोकबाट एक हजार २ सय थान सुइजन्य लागूऔषधसहित कानु तथा पासवानलाई नियन्त्रणमा लिइएको पर्साका डिएसपी गौतम थापाले जानकारी दिए ।