रुकुम, १४ भदौं । रुकुम पश्चिमको आठबीसकोट–६ दामाचौरबाट पाइप लिएर डोल्पातर्फ जाँदै गरेको ट्याक्टर सडकभन्दा करिब १५० मिटर तल खस्दा दुईजनाको मृत्यु भएको छ । भे १ च ७८९३ नम्बरको ट्याक्टर ठूलीभेरी नदीमा खस्दा तीनजना घाइते भएका हुन्।

दुर्घटनामा परी आठबीसकोट नगरपालिका–५ का १६ वर्षीय धनबहादुर विकको घटनास्थलमै मृत्यु भएको हो । नाम नखुलेका डोल्पाका एक जनाको उपचारको लागि अस्पताल ल्याउने क्रममा बाटोमा मृत्यु भएको जिल्ला प्रहरी कार्यालय रुकुम पश्चिमका प्रहरी प्रमुख सुमित खड्काले जानकारी दिए ।

दुर्घटनामा परी चालक आठबीसकोट नगरपालिका–६, दामाचौरका २० वर्षीय चन्द्रबहादुर वादी गम्भीर घाइते भएका छन् । सोही वडाको छिमिका १५ वर्षीय मोहन बोहरा र सोही ठाउँका १७ वर्षीय बलबहादुर विक सामान्य घाइते भएको डिएसी खड्काले बताए । घाइते सबैको आठबीसकोट नगर अस्पतालमा उपचार भइरहेको प्रहरीले बताएको छ ।