कलैया, १५ भदौं । नेपाल र भारतका हिन्दू धर्मावलम्बीहरु बीच बलीका लागि प्रसिद्ध बारा जिल्लाको बरियारपुरमा मंसिरमा लाग्ने प्रसिद्ध गढीमाइ मेलामा चढाइने राँगाको सिनो चमार समुदायले नफाल्ने अभियानलाई निरन्तरता दिने निर्णय गरिएको छ ।

एक दशकदेखि गढीमाई मेलामा चमार समुदायले सिनो फाल्न छाडेका छन् । तर त्यो पूर्ण रुपमा प्रभावकारी हुन सकेको छैन् । हरेक ५ वर्षमा मंसिर महिनामा लाग्ने गढिमाई मेलामा नेपाल र भारतका हजारौ श्रद्धालुहरुले राँगाको बलि दिने गर्छन् । संसारमै सर्वाधिक बलि प्रदान हुने गढिमाई मेलामा भारतको सर्वोच्च अदालतले भारतबाट बलि प्रदानका लागि लगिने राँगा, खसीबोकाहरुमा रोक लगाउने आदेश दिएको छ । तरपनि बलि प्रदान हुँदै आएको छ ।

राँगाको बलि बढने क्रमसँगै मेला आयोजकहरुले मासु ठेक्का लगाउन थालेकोछ । एक दिन मात्र हुने बलिप्रदानको क्रममा काटिएका राँगाहरु ठेकदारले मासुका लागि लग्ने गरेका छन् । ठेकदारले मासु लगेपछि बाँकी रहेका राँगाहरुको सिनो चमारजातीले बहिष्कार गरेका छन् । यद्यपी पछिल्लो मेलामा पनि चमार जातीका केहि मानिसहरुले सिनो लिएका थिए ।

शनिवार सो जातिको चैनपुरमा भएको भेलाले सिनो नखाने र त्यसका लागि अभियान चलाउन समिति गठन गरेकोछ । दशरथ रामको अध्यक्षतामा सिनो बहिष्कार अभियान समिति गठन गरिएको र सो समितिले अहिलेदेखि नै बारा, पर्सा जिल्लामा वहिष्कारको अभियान सञ्चालन गर्ने बताए ।

समितिका सचिव राजनारायण रामले सिनो वहिष्कारको अभियान चलाउन अहिले समय रहेकाले यस पटक प्रभावकारी हुने बताए । ‘गढिमाई मेलामा दिइने राँगा बलिको सिनो खाँदा समाजमा हेय दृष्टिले देखिन्छ’ सचिव रामले भने, सिनो खाँदा रोग लाग्ने संभावना रहेको हुन्छ ।

बारा र पर्सा जिल्लाका विभिन्न गाउँ टोलहरुको चमारवस्तीमा पुगेर सिनो बहिष्कार गर्न आग्रह गर्ने अध्यक्ष रामले जनाए । २०६६ सालमा मेला समितिले सिनो ठेक्का लगाएदेखि नै सिनो वहिष्कारको क्रम सुरु भएको हो ।