काठमाडौं, १९ भदौं । अमेरिकाको मिजुरी राज्यमा कार दुर्घटना हुँदा तीन नेपालीको मृत्यु भएको छ । मंगलबार भएको दुर्घटनामा परि अन्य २ जना घाइते भएका छन् ।
मृत्यु हुनेमा श्रद्धा खनाल ओझा, उनका बुबा गोविन्द खनाल र आमा शान्ता खनालका रहेको स्थानीय जोप्लिन प्रहरीले जनाएको छ । त्यस्तै श्रद्धाका पति प्रभाश ओझा र उनीहरूका ४ वर्षीय छोरा अस्पतालमा उपचारत छन् ।
प्रभाशको अवस्था स्थिर छ भने बालकको अवस्था चिन्ताजनक रहेको बताइएको छ । गोविन्दलाई घटनास्थलमा, तथा श्रद्धा र आमा शान्तालाई अस्पताल मृत घोषित गरिएको थियो ।
गाडी श्रद्धाका पति प्रभाशले चलाएको बुझिएको छ । उनीहरु ब्ल्यु स्प्रिङ्समा बस्दै आएका थिए । श्रद्धाका बुबा आमा नेपालबाट अमेरिका घुम्न गएका थिए ।
प्रभाश आफ्नो टोयोटा आरएभी ४ हाँकेर मिजुरी २४९ को अन्तरराज्य राजमार्ग ४४ पूर्व गइरहेका थिए । उनले गाडी बत्तिमा रोकेका बेला पछाडीबाट टोयोटाको पिकअप ट्रकले ठक्कर दिएको थियो ।
