जनकपुरधाम, १९ भदौं । साइकल वितरण समारोहमा अध्यक्षता गर्ने विषयमा महोत्तरीको बलवा नगरपालिकामा कुटाकुट भएको छ ।
वडा नम्बर ७ मा रहेको माध्यमिक विद्यालय बनौटामा साइकल वितरण कार्यक्रमको आयोजना गरिएको थियो । कार्यक्रमको अध्यक्षता नगराएको झोकमा वडाध्यक्ष विजय महतोले विद्यालयका प्रअ महेश कुमार झामाथि हातहात गरेका हुन् ।
बेटी पढाउ, बेटी बचाउ कार्यक्रम अन्तर्गत विहिवार उक्त विद्यालयमा छात्राहरुलाई साइकल वितरण कार्यक्रम आयोजना गरिएको थियो । उक्त कार्यक्रमका प्रमुख अतिथि भने मुख्यमन्त्री लालबाबु राउत थिए । राउत सहभागी कार्यक्रममै झडप हुँदा पनि उनी साइकल वितरण गरेर फर्केका छन् ।
तर प्रअ झालाई हातपात गरेको भन्दै केहि विद्यार्थीले वडाध्यक्ष महतोको घर घेराउ गरे । साथै घरमा ढुंगामुढा समेत गर्न थालेपछि पुगेको प्रहरीसँग झडप भएको छ । स्थिति नियन्त्रणमा लिन प्रहरीले लाठी चार्ज गर्दा दर्जनौं विद्यार्थी घाईते भएका छन ।
घाईते विद्यार्थीहरुको उपचार जनकपुर अंचल अस्पतालमा भइरहेको छ । त्यहाँको अवस्था अहिले सामान्य बनेको र विवाद मिलाउने प्रयास गरिरहेको महोत्तरीका एसपी श्यामकृष्ण अधिकारीले जानकारी दिए ।
