वीरगञ्ज, २० भदौं । वीरगञ्ज महानगरपालिकामा विद्यालय जाने क्रममा एक छात्रामाथि एसिड प्रहार भएको छ ।
वीरगञ्ज महानगरपालिका वडा नम्बर १ छपकैया बस्ने १५ वर्षीया छात्रा मुस्कान खातुनमाथि शुक्रबार बिहानै एसिड प्रहार भएको हो । दुई युवकले खातुनलाई वीरगञ्ज ६ गणेशमान चोकमा एसिड प्रहार गरेको प्रहरीले जनाएको छ ।
एसिड प्रहार गर्दा खातुन गम्भीर घाइते भएकी छिन् । गम्भीर घाइते भएकी छात्रालाई उपचारको लागि नारायणी अस्पतालमा लगिएको प्रहरीले जनाएको छ । मुखमै एसिड प्रहार गरेको बुझिएको छ ।
एसिड प्रहार गर्ने छपकैया टोलकै सम्साद मिया मक्सेद आलम रहेको पर्साका डिएसपी अनन्तराम शर्माले जानकारी दिए । उनी पक्राउ परिसकेका छन् । अन्य एक जना फरार भएका छन् ।
