पर्सा, २१ भदौं । वीरगञ्जमा छात्रा मुस्कान खातुनमाथि एसिड आक्रमण गर्ने मजिद मिया पनि पक्राउ परेका छन् । प्रहरीले उनलाई वीरगन्जबाटै पक्राउ गरेको हो ।

दुई अभियुक्त मध्ये सम्साद आलम घटना भएलगत्तै पक्राउ परेका थिए । सहयोगी सम्साद आलमसँग मिलेर मजिदले एसिड आक्रमण गरेको पर्साका एसपी सोमेन्द्र सिंह राठौरले जानकारी दिए ।

शुक्रबार बिहान त्रिभुवन हनुमान माविमा कक्षा ९ मा अध्ययनरत मुस्कान साथीसँग विद्यालय जाँदै गर्दा वीरगन्ज–४ बिर्तामा रहेको गणेशमानोक नजिक एसिड आक्रमण भएको थियो ।

एसिडले मुस्कानको अनुहार, छाती र हात तथा कपडाहरु जलेको छ । अवस्था गम्भिर रहेको उनको अहिले काठमाडौंमा उपचार भइरहेको छ ।