महोत्तरी, २१ भदौं। तीन साताअघि घूससहित जनकपुरधामबाट पक्राउ परेका तीन जनाबिरुद्व भ्रष्टाचार मुद्दा दायर भएको छ । पक्राउ परेका बुभवा–छोरासहित तीन जनाबिरुद्व अख्तियार दुरुपयोग अनुसन्धान आयोगले शुक्रबार भ्रष्टाचारको मुद्दा दायर गरेको हो ।

जनकपुरधाम उपमहानगरपालिका ९ पिडारी चोकस्थित राष्ट्रिय बाणिज्य बैंक अगाडिबाट महोत्तरीको भंगहा नगरपालिका ८ का सदस्य कारी साहका छोरा मुकेश घूससहित २८ साउनमा पक्राउ परेका थिए ।

अख्तियार दुरुपयोग अनुसन्धान आयोग बर्दिबासको टोलीले वडा सदस्य साहका छोरा मुकेशलाई रु १ लाख ६० हजार घूससहित रंगेहात पक्राउ गरेको थियो ।

सडक ढलान गरेको उपभोक्ता समितिका पदाधिकारीको बिल पास गरिदिने नाममाम वडाध्यक्ष रफिक आलम र सदस्य कारीले घूस मागेका थिए । उपभोक्ता समितिका पदाधिकारी जनकपुरमा घूस दिने बताएपछि कारीले आफ्ना छोरालाई उक्त रकम लिन जनकपुरधाम पठाएका थिए ।

मुकेशलाई नियन्त्रणमा लिएपछि उनका पिता कारी र वडा अध्यक्ष आलमलाई उनीहरुको घरबाटै पक्राउ गरिएको थियो । यी तीनै जनाबिरुद्व अख्तियार दुरुपयोग अनुसन्धान आयोगले शुक्रबार विशेष अदालतमा मुद्दा दायर गरेको छ ।

अख्तियार दुरुपयोग अनुसन्धान आयोगका अनुसार तीनैजना विरुद्ध १ लाख ६० हजार विगो कायम गरी भ्रष्टाचार निवारण ऐन २०५९ को दफा ३ को उपदफा १ र दफा ३ को उपदफा (१) को देहाय (घ) बमोजिम जरिवाना र सजाय माग दावी सहित मुद्दा दायर गरिएको हो ।

महोत्तरीमा यसअघि पनि एक जना जनप्रतिनिधी घूससहित पक्राउ परेका थिए । एकडारा गाउँपालिका–४ का एक जना वडा सदस्यलाई गत जेठ १७ गते अख्तियार दुरुपयोग अनुसन्धान आयोग बर्दिबासको टोलीले ३६ हजार घूससहित पक्राउ गरेको थियो ।

त्यस बेला वडा सदस्य रामचन्द्र राय यादवलाई ठेकेदारसँग घूस लिँदै गर्दा पक्राउ गरिएको थियो । रु १० लाखको लागतमा निर्माण भइरहेको ‘जानकी धर्मशाला चकवा’ निर्माणमा वडा सदस्य यादवले ठेकेदारलाई घूस माग्दै निर्माणमा अवरोध गरिरहेको बेला ठेकेदारले ३६ हजार घूस दिने भएपछि वडा सदस्य यादवले निर्माण गराउन मानेका थिए ।

वडा सदस्य यादवले सो घूस रकम आफ्नो गाउँपालिकाको क्षेत्रभित्र नभएर जलेश्वर नगरपालिका–१ स्थित शलहेश चोकमा रहेको सनी किराना पसलमा लिने भनेपछि अख्तियारको टोलीले सोही ठाउँबाट पक्राउ गरेको हो । उनीबिरुद्व पनि विशेष अदालतमा भ्रष्टाचारको मुद्दा दायर भइसकेको छ । जनकपुर टुडेबाट !