जनकपुरधाम, २३ भदौं । प्रदेश २ को नामाकरणको विषयमा प्रदेश सभामा आइतवार व्यापक बहस भएकोछ । दलगत रुपमा पेश गरिएको प्रदेशको नामको पक्षमा नै साँसदहरुले आ–आफ्ना धारणा राखे ।
सत्तारुढ समाजवादी पार्टी र राष्ट्रिय जनता पार्टी (राजपा)ले मधेश प्रदेशको वकालत गरेका छन् । तर प्रमुख प्रतिपक्षी दल नेपाल कम्युनिष्ट पार्टी (नेकपा)ले जानकी प्रदेश नाम राख्नुपर्नेमा जोड दिएको छ । नेपाली काँग्रेसका साँसदहरुले मिथिला–भोजपुरा नाम राख्न उपयुक्त हुने सुझाव दिएको छ ।
प्रदेश २ मा नाम र राजधानीको विवाद चल्दै आएको छ । प्रदेशको राजधानी जनकपुरधामको पक्षमा व्यापक समर्थन देखिएको छ । सप्तरी, सिरहा, धनुषा, महोत्तरी, सर्लाही र रौतहटका साँसदहरुले राजधानी जनकपुरधाम नै उपयुक्त हुने धारणा व्यक्त गरे । बारा र पर्सा जिल्लाका साँसदहरु भने बीरगञ्जको पक्षमा धारणा राखेका छन् ।
राजधानी र नामाकरणमा साँसदहरुको राजनीतिक समिकरण फरक छ । वीरगञ्जलाई राजधानी बनाउने पक्षमा रहेका साँसदहरु मधेश प्रदेशको पक्षमा आफ्ना धारणा राखेका छन् । आइतवार साँझ सम्म चलेको प्रदेश सभाको बैठक नामाकरणमा नै केन्द्रित थियो ।
जनकपुरधाम राजधानी राख्न दुई तिहाई सहजै पुगेपनि नामाकरणमा त्यो स्थिति देखिएको छैन् ।नेपाल कम्युनिष्ट पार्टी (नेकपा) संसदीय दलका नेता सत्यनारायण मण्डलका अनुसार प्रदेशको नाम जानकी प्रदेश राख्नु उपयुक्त हुनेछ । नेकपाले लिखित रुपमा नै जानकी प्रदेश प्रस्ताव गरेकोछ ।
नेपाली काँग्रेस संसदीय दलका नेता रामसरोज यादव प्रदेशको नाम मिथिला–भोजपुरा राख्नुपर्ने अडानमा कायमै छन् । जनयुद्ध र त्यसपछिको केहि वर्ष पूर्व नेकपा माओवादीले मिथिला–भोजपुरा प्रदेश नामाकरण गरेका थिए ।
