जनकपुरधाम, २८ भदौं । धनुषाको कमला नगरपालिकाले चालू आर्थिक बर्ष २०७६/०७७ का लागि रु ५४ करोड ९१ लाख ८८ हजार ८ सय ३९ विनियोजन गरेको छ ।
नगरपालिकाको शुक्रबार भएको दोस्रो नगरसभामा यो बजेट सार्वजनिक गरिएको हो । कुल बजेटमध्ये ३७ करोड ६७ लाख २५ हजार अर्थात् ६८.६ प्रतिशत पूँजीगत र रु १७ करोड २४ लाख ६३ हजार ८ सय ३९ अर्थात् ३१.४ प्रतिशत चालू खर्चमा विनियोजन गरिएको छ ।
यो नगरपालिकाले राजश्व बाँडफाँडबाट रु ९ करोड ११ लाख, नेपाल सरकारबाट प्राप्त हुने वित्तिय समानीकरण अनुदान ११ करोड, ९५ लाख र संघीय सरकारबाट हस्तान्तरित बिभिन्न कार्यक्रम लगायत सामाजिक सुरक्षा कार्यक्रमका लागि सशर्त अनुदानबाट १२ करोड ४५ लाख, प्रदेश सरकारबाट वित्तिय समानीकरण अनुदान रु २ करोड ४३ लाख ७१ हजार र गत आ.ब. २०७५/७६ को चालू तथा पूँजीगतबाट मौज्दात रु १८ करोड १९ लाख १८ हजार ९ सय ९० गरी सन्तुलित बजेट अनुमान गरेको छ ।
बजेटमा चालू आ.ब. मा पूर्वाधार विकासका कार्यलाई प्राथमिकता दिई पूर्वाधार विकासमा रु २३ करोड ३३ लाख ७० हजार् विनियोजन गरिएको छ । यसमध्ये संस्थागत भवनहरु, सडकहरुमा बढी बजेट विनियोजन गरिएको छ भने सामाजिक विकास, आर्थिक विकास, विपद् व्यवस्थापन तथा वातावरण संरक्षण र कार्यालय संचालन तथा प्रशासनिक खर्चको लागि बजेट विनियोजन गरिएको छ ।
नगरपालिकाका मेयर रामउद्गार गोइतको अध्यक्षतामा आयोजित नगरसभामा उप–मेयर शिला मण्डलले बजेट प्रस्तुत गरेकी थिइन् । नगरसभामा बिभिन्न राजनीतिक दलका प्रतिनिधी, वडा अध्यक्षहरु, प्रमुख प्रशासकीय अधिकृत उमेश यादवसहितको उपस्थिति थियो ।
