जनकपुरधाम, २ असोज । संविधान दिवसको अवसर पारेर प्रदेश २ मा तीन दिवसीय कार्यक्रम तय भएको छ । देशैभरि फैलिएको डेंगु रोग नियन्त्रण सम्बन्धी जनचेतना फैलाउनेदेख लिएर सरसफाईसम्मको कार्यक्रम प्रदेश सरकारले तय गरेको हो ।

असोज २ गतेदेखि चार गतेसम्म प्रदेशको अस्थायी राजधानी जनकपुरधाममा संविधान दिवसको कार्यक्रम हुनेछ । पहिलो दिन आज सरसफाई र डेंगु रोगबारे जनचेतना फैलाउने कार्यक्रम गरियो । जनकपुरधामको जिरोमाइल चोकदेखि बसपार्कसम्म सरसफाई गर्दै डेंगु रोग नियन्त्रणबारे जनचेतना फैलाउने कार्यक्रम गरिएको छ ।

मुख्यमन्त्री कार्यालयका सचिव शंकर सुवेदीको अगुवाइमा कार्यक्रम गरिएको हो । तर प्रदेशका मन्त्रीहरु सहभागी भएनन् । असोज ३ गते बिहान ६ः३० बजे जानकी मन्दिरदेखि मुख्यमन्त्री कार्यालयसम्म प्रभातफेरी हुनेछ । तेस्रो तथा अन्तिम दिन असोज ४ गते दुई वटा कार्यक्रम गरिनेछ । यस दिन मधेश भवन परिसरभित्र सरसफाई तथा बृक्षारोपण गरिने कार्यक्रम तय गरिएको छ ।

यही दिन लागूऔषधबिरुद्वको चेतनामूलक ¥याली पनि प्रदर्शन गरिनेछ । मुख्यमन्त्री कार्यालयदेखि जानकी मन्दिरसम्म यो ¥याली प्रदर्शन गर्दै लागूऔषधबिरुद्वको चेतना फैलाइने कार्यक्रम निर्धारण गरिएको मुख्यमन्त्री कार्यालयले जनाएको छ ।

तीनै दिन साँझ प्रदेश सरकारले दीपावली मनाउने कार्यक्रम तय गरेको सुवेदीले बताए । तर यि कार्यक्रमहरुमा भने प्रदेशका मन्त्रीहरु सहभागी हुने छैनन् ।

प्रदेशको मन्त्रीपरिषद् बैठकले नै संविधान दिवस मनाउन बिभिन्न गतिविधी निर्धारण गरिएपनि ती गतिविधीमा कर्मचारी मात्रै सहभागी हुने भएका छन् । प्र्रदेशको सत्तामा रहेको समाजवादी र राष्ट्रिय जनता पार्टी (राजपा) नेपालका कुनै पनि मन्त्री उक्त कार्यक्रममा सहभागी नहुने बुझिएको छ ।

राजपाले संविधान दिवसका दिन बिरोध कार्यक्रम गर्ने र राति ब्ल्याक आउट गर्ने कार्यक्रम तय गरेको छ । राजपाका मन्त्रीहरु यो कार्यक्रममा सहभागी हुनुभन्दा पार्टीको कार्यक्रममा सहभागिता जनाउनेछन् । समाजवादी पार्टीले संविधान दिवसको औपचारिक कार्यक्रम तथा बिरोधका कार्यक्रममा समेत सहभागिता नहुने जनाएको छ । यस कारण यो पार्टीका मन्त्रीहरु पनि सहभागी हुने छैनन् ।

समाजवादी पार्टीको तर्फबाट आन्तरिक मामिला तथा कानून मन्त्री रहेका ज्ञानेन्द्र यादवले आफूसहित कुनै पनि मन्त्रीले उक्त कार्यक्रममा सहभागिता नजनाउने बताए । उनले मुख्यमन्त्री समेत कार्यक्रममा सहभागी नहुने बताए । संविधान संशोधन नभएसम्म औपचारिक कार्यक्रममा आफूहरु सहभागी नहुने उनको भनाई छ । मन्त्री यादवले भने, “संविधानमा धेरै उपलब्धी भएकाले संविधान जलाउनेतर्फ पनि हामी जान्नौं ।

मन्त्री यादवले संविधान संशोधन भएपछि मात्रै आफूहरु्र यस्ता कार्यक्रममा सहभागी हुने बताए । उनले संविधान दिवसका दिन आफ्नो पार्टीले जनकपुरधाममा संविधानको अपरिहार्यता बिषयक अन्तरकृया कार्यक्रमको आयोजना गर्ने बताए । यसअघि मुख्यमन्त्री लालबाबु राउतले पनि संविधान सर्वाेत्कृष्ट संविधानभन्दा पनि राम्रो भएको बताएका थिए ।