काठमाडौं, २ असोज । नेपाल नागरिक उड्डयन प्राधिकरणले आफ्ना कर्मचारीलाई ७ आर्थिक वर्षको नाफाबाट एकैपटक बोनस बाँड्ने भएको छ । प्राधिकरणले आर्थिक वर्ष २०६८/६९ देखि आर्थिक वर्ष २०७४/७५ सम्मको नाफाबाट बोनस बाँड्न लागेको हो ।
प्राधिकरणका महानिर्देशक राजन पोखरलेलले नाफाबाट १ अर्ब २६ करोड ३१ लाख रुपैयाँ कर्मचारीलाई बोनस वितरणको तयारी गरिएको जानकारी दिए । उनले संस्कृति, पर्यटन तथा नागरिक उड्डयन मन्त्रालयबाट बोनस वितरणको निर्णय स्वीकृत भएको र अन्तिम स्विकृतिका लागि अर्थ मन्त्रालय पठाइएको पनि बताए ।
सेवा प्रदायकको हैसियतमा नाफा खुवाउन लागेको उनको भनाइ छ । प्राधिकरणले सेवा प्रदायक र नियमनकारी निकाय दुवैको भूमिका निर्वाह गर्दै आएको छ । आफ्नो कूल नाफाको ९० प्रतिशत रकम सेवा प्रदायकको हैसियतले प्राप्त हुने पोखरेलले बताए ।
