राजविराज, ७ असोज । सप्तरीको एक सरकारी स्वास्थ्य संस्थाले नै बिरामीलाई म्याद गुज्रेको औषधि प्रदान गरेको छ । खोकी लागेर स्वास्थ्य संस्थामा जचाउँन गएका एक बृद्वलाई सरकारी स्वास्थ्यकर्मीले नै म्याद गुज्रेको औषधि बितरण गरेको हो ।
म्याद गुज्रेको औषधि खाँदा ती बृद्व बेहोस भएका छन् । केहि दिनअघि थोरै खोकी लाग्दा र कमजोरी महसुस गरिरहेका हनुमाननगर कंकालनी नगरपालिकाका ती बृद्वलाई सोही नगरपालिकाको वडा नम्बर ४ मधवापुरस्थित स्वास्थ्य चौकीका स्वास्थ्यकर्मीले म्याद गुज्रेको औषधि बितरण गरेका छन् ।
सोही ठाउँका ७० बर्षीय धियानी मण्डल स्वास्थ्य संस्थामा जँचाउन जाँदा स्वास्थ्यकर्मीले मोक्सिलेब ५०० एमजीको एन्टिबायोटिक ट्याब्लेट दिएका थिए । उक्त ट्याब्लेटको म्याद एक महिनाअघि नै गुज्रिसकेको छ । उक्त औषधिको समय अगस्ट २०१९ मै गुज्रिसकेको छ ।
म्याद गुज्रेको औषधि खाँदा उनी हनुमाननगर कंकालनी नगरपालिका १ स्थित भारदह बजारमा आईतबार साँझ बेहोस भएका थिए । संयोगले स्वास्थ्य संस्थाबाट लिएको औषधि र पूर्जा उनको साथमै थियो । स्थानीयहरुले उनको उद्वार गरी औषधि हेर्दा म्याद गुज्रेको पाइएको स्थानीय गंगा साहले बताए ।
औषधि उनलाई दिइएको स्वास्थ्य संस्थाका कर्मचारीहरु स्वीकार्छन् । यद्यपी उनी म्याद गुज्रेको औषधि खाँदा थोरै एलर्जी भएको बताउँछन् । आफूहरुले यस्तो सूचना पाएपछि एलर्जी ठीक पार्ने औषधि दिएको उक्त स्वास्थ्य संस्थाका प्रमुख हेल्थ असिष्टेन्ट योगेश मण्डलले बताए ।
भूलवश म्याद गुज्रेको औषधि उनलाई कर्मचारीहरुले दिएका रहेछन्’ उनले भने, ‘ समय गुज्रेका औषधिहरुलाई अलग ठाउँमा राखेपनि बितरण गर्ने कर्मचारीले त्यहीं
औषधि दिए ।’
‘सरकारी स्वास्थ्य संस्थाले नै समय गुज्रेको औषधि दिनु भूल नभएर महाभूल हो’ अधिकारकर्मी जंगबहादुर सिंह भन्छन्, ‘समय गुज्रिसकेको औषधिलाई नष्ट गर्नुको सट्टा राखिरहनु गलत नियत हुन सक्छ ।’
‘औषधि खरीद गर्ने नाममा म्याद गुज्रेका औषधि राखेर जनतालाई त्यहीं बितरण गर्न सक्ने समेत हुन सक्छ,’ नी भन्छन्, ‘यसको सुक्ष्म तरिकाले छानबिन हुनु जरुरी छ ।’
गैर सरकारी संस्था महासंघका अध्यक्ष शम्भुनन्द चौधरीले पनि ग्रामिण क्षेत्रका बासिन्दाले म्याद गुज्रेको अध्ययन नगर्ने भएकाले दिदैं जाने पनि हुन सक्ने भएकाले यसको छानबिन हुनुपर्ने बताउँछन् ।
