काठमाडौं, ८ असोज । कृषि विकास बैंकको लहान शाखाबाट चार करोड ७३ लाख रुपैयाँ चोरी भएको पुष्टि भएको छ ।
शुरुमा चोरी भएको रकम डेढ करोड भनिएको थियो । तर बैंकका उपप्रबन्धक दीर्घ अर्यालले चार करोड ३७ लाख रकम निकालिएको पुष्टि गरेका छन् । ‘यो सबै रकम शाखाको ब्याज आम्दानी हो’ उनले सुनाए ।
कृषि विकास बैङ्कको बैंकिङ सिस्टम प्रयोग गरेर रकम चोरी गरेको आरोपमा ११ जनालाई प्रहरीले पक्राउ गरेको छ । राजधानीसहित अन्य विभिन्न स्थानबाट उनीहरुलाई पक्राउ गरिएको महानगरीय प्रहरी परिसर काठमाडौंले जानकारी दिएको छ ।
पक्राउ पर्नेमा नुवाकोटको मेघाङ गाउँपालिका–४ का लवङ तामाङ, लमजुङ दोदी गाउँपालिकाका विद्यासागर लामिछाने, सर्लाहीका पुष्पराज खड्का, काठमाडौं ताकेश्वरका सञ्जय घले, तारकेश्वरकै लक्ष्मी लामा तामाङ, निर्मला तामाङ, निमा तामाङ, लक्ष्मी श्रेष्ठ र श्रवण कुमार श्रेष्ठ रहेका छन् ।
यसैगरी कैलालीको भजनीका विजयकुमार शाह र भारत कलकताका शुभन्कर पन्जापनि पक्राउ परेका छन् ।
