राकेश यादव/ रौतहट, १५ असोज । रौतहट प्रहरीले ८ महिनाको अवधिमा विभिन्न घटनाका आरोपित, दोषी तथा फरार १ सय ४ अभियुक्तलाई पक्राउ गर्न सफल भएको छ ।
पक्राउ अभियान अन्तर्गत साइबर क्राइमदेखि लिएर जुवातास, अदालतबाट दोषी ठहर भई फरार, बम काण्डमा संलग्न सहितका १ सय ४ अभियुक्त पक्राउ परेका हुन् । प्रहरीको यो ठूलो सफलता भएको स्थानीय बताउँछन् । विशेष अनुसन्धान गर्नका लागि गठित क्राइम इन्भेस्टिगेसन टीम (सीआईटी)को टोलीले गोप्य सूचनाको आधारमा यतिधेरै अभियुक्तलाई पक्राउ गरेको छ ।
कभर्ट अप्रेशन अभियान अन्तर्गत हालसम्म फरार अभियुक्त २० जना, अदालतबाट दोषी ठहर भई फरार रहेका अपराधी ९ जना, साइबर क्राइममा संलग्न रहेका व्यक्ति ५ जना, विभिन्न चोरीको घटनामा संलग्न रहेको २४ जना, डाँका र चोरीमा संलग्न २१ जना, मानव बेचबिखनमा संलग्न भएको ६ जना, सीसी कैमरा फूटाएको आरोपमा १ जना, फेसबुक ह्याक गरेका ५ जना, बम काण्डको अपराधी ३ जना, टेम्पू चालकसहित टेम्पू लूटपाटको घटनामा संलग्न १ जना, जुवा खेल्दै गर्दा ९ जना पक्राउ परेका छन् ।
यस्तै जिल्लाको विभिन्न ठाउँबाट भन्सार चोरी निकासी पैठारीका ३ करोड ८९ लाख २९ हजार ६६९ रुपैया मूल्य बरावरको तस्करीका समानहरु बरामद गरी प्रहरीले भन्सारमा बुझाएको छ ।
८ महिनाको सार्वजानिक गरेको कार्य प्रगति अनुसार लागू औषध गाजा २३ किलो ५ सय ग्राम बरामद गर्नुको साथै ८ जनालाइ पक्राउ गरिएको छ । लागू औषध इंजेक्शन ३ सय पीस र टेबलेट १५ सय पीस साथै १० जना लाइ नियंत्रणमा लिन सीआईटी टोली सफल भएको हो ।
५ कट्ठामा गरिएको अफीम खेती नस्ट गरिएको छ । हराएको मोबाइल बरामद गरी ३० जनालाई जिम्मा लगाइएको र हराएको बालबालिका १९ जनालाई खोजतलास गरी अभिभावकके जिम्मा लगाइएको जिल्ला प्रहरी कार्यालयले जनाएको छ ।
कटुवा पिस्तौल ४ र गोली राउंड ४, चोरीको चार चक्का गाड़ी ३ बटा स्कार्पियो र ३ बटा बोलेरो, चोरीका विभिन्न कम्पनीका ५३ बटा मोटर साइकल, १ किलो सुन बरामद गरिएको छ भने ७ वटा लागुऔषध मुद्दाको सफल अनुसन्धान गरिएको प्रहरी निरीक्षक नायकले बताए ।
सीआईटीको नेतृत्व गर्दै आएका नायकले अपराध न्यूनीकरण गरी समाजमा शान्तिको बातावरण सृजना गरी त्रासको अवस्था हटाउने बताए । उनले रौतहटमा पहिलो पटक सीआईटी टीम बनाइएको पनि बताए । फरक ढंगबाट सत्य तथ्य बुझी प्रमाणसहित अनुसन्धान गर्ने उद्देश्यले क्राइम इन्भेस्टिगेशन टीम १२ सदस्य बनाइएको उनको भनाई छ ।
