महेन्द्रनगर, १८ असोज । दशैं, तिहारलाई लक्षितगरी आयोजना गरिएको दशैं बजारमा ग्राहकहरुको घुइच्चो लाग्न थालेकोछ । बजारमा ग्राहकहरुको बढदो भीडसँगै कारोबारको रकमपनि बढेको छ ।
क्षिरेश्वर उद्योग वाणिज्य संघले पहिलो पटक आयोजना गरेको दशैं बजारमा दुई करोड बढीको कारोबार भएकोछ ।संघका अध्यक्ष सुरेश यादवका अनुसार दशैं बजारप्रति ग्राहकहरुको आकर्षण बढनुको कारण गुणस्तरीय र सस्तो मुल्यमा समान उपलब्ध हुनु हो ।
‘दशैं बजारमा व्यवसायीहरुले उपभोक्ताको हितलाई ध्यान दिएका छन्’उनले भने, नगदमा समान बिक्री हुनुपनि ब्यवसायीहरुको उपलब्धि हो । प्रदेश २ का सबै मुख्य सहरमा दशैं बजारको आयोजना गरिएको छ । तर दशैं बजारमा दैनिक उपभोग्यका वस्तुहरुको भन्दा प्लाष्टिक, विस्कुट, चाउचाउ, अगरवती, साबुन जस्ता वस्तुहरुको कारोबार अधिक हुने गरेको छ ।
मुल्य अकासिएको वस्तुहरु भने दशैं बजारमा उपलब्ध नरहेको उपभोक्ताहरुले गुनासो गरेका छन् । ‘म्याद गुज्रने अवस्थामा रहेका वस्तुहरु दशैं बजारमा बढी बिक्री हुने गरेको छ’गोपाल धर्मशाला दशैं बजारका उपभोक्ता रामस्वरुप साहले भने, ‘प्याज, चामल, दाल लगायतका वस्तुहरु दशैं बजारमा उपलब्ध नै छैन् ।’
वर्षाले दशैं मेला र बजार प्रारम्भमा समान्य प्रभावित भएपनि हाल ग्राहकहरुको उलेख्य भीड भएको छ ।
