लहान, २३ असोज । प्रहरीले सिरहाबाट युवती अपहरण गर्दागर्दै तीन पक्राउ परेका छन् । पक्राउ परेका तीनै जनालाई सिरहा प्रहरीले सार्वजनिक गरेको हो ।
सिरहा नगरपालिका ९ का २४ वर्षीय रामप्रकाश गोइत, ३६ वर्षीय गणेशकुमार यादव र २२ वर्षीय नथुनी भनिने चतुरानन्द यादव पक्राउ परेको सिरहाका प्रहरी प्रवक्ता प्रहरी नायब उपरीक्षक अपिलराज बोहराले जानकारी दिए ।
उनका अनुसार मंगलवार राति दसैँको मेला हेरेर फर्कने क्रममा युवतीलाई पाँच जना मिलेर अपहरण गरेका थिए । अपहरण गर्नेहरुमा तीनजना प्रहरीको नियन्त्रणमा रहेको छन् भने दुई जना अझै फरार रहेको सिरहा प्रहरीले जनाएको छ।
पूर्वपश्चिम राजमार्ग अन्तर्गत गोलबजार नगरपालिकाको मुसहर्नियाबाट युवतीलाई अपहरण गरिएको थियो । अपहरणमा परेकी युवतीलाई प्रहरीले बुधवार बिहान सकुशल उद्धार गरेको छ ।
अपहरणमा संलग्न रहेकोलाई तीन जनालाई पक्राउ गरी सिरहा प्रहरीले आजै सार्वजनिक गरेको छ । बीआर ३२ पी ए ४२६२ नम्बरको भारतीय जीपबाट अपहरण गरेर लगिरहेको अवस्थामा सिरहा नगरपालिका ९ गुलरीया चौकबाट युवतीलाई सकुशल उद्धार गरेर तीनजनालाई पक्राउ गर्न सफल भएको प्रहरी नायव उपरीक्षक बोहराले बताए ।
फरार रहेका दुई जनाको खोजी भइरहेको उनले बताए । साथै पक्राउ परेकाहरुको साथबाट प्रहरीले आठ राउण्ड गोली र तीन सय पिस नाइट्रोभेट लागुऔषधसमेत बरामद गरेको छ ।
