राजविराज, २४ असोज । चिनियाँ राष्ट्रपति सी जिनपिङको नेपाल भ्रमणको क्रममा विरोध प्रदर्शन गर्ने आशंकामा सत्तारुढ समाजवादी पार्टीकी नेतृ सुनिता साहलाई प्रहरीले पक्राउ गरेको छ ।
नेतृ साहलाई शुक्रबार सप्तरी सदरमुकाम राजविराज ६ स्थित घरबाटै प्रहरीले पक्राउ गरेको हो । महानगरीय प्रहरी वृत्त कमलपोखरीले गरेको पत्राचारको आधारमा नेतृ साहलाई पक्राउ गरिएको सप्तरीका प्रहरी प्रमुख एसपी कृष्ण प्रसाइँले जानकारी दिए । उनले पक्राउ परेकी नेतृ साहलाई काठमाडौं पठाइने पनि बताए ।
चीनका विदेशमन्त्री वाङ यी भदौको तेस्रो साता काठमाडौं आएको बेला नेतृ साह पनि चीनको दूतावास अगाडि प्रदर्शन गरेकी थिइन् । उक्त प्रदर्शनमा सहभागी नेतृ साहसहित १० जनाबिरुद्व अभद्र व्यहारको मुद्दा चलाइएको थियो ।
चिनियाँ राष्ट्रपति नेपाल आउन लाग्दा सरकारले गरिरहेको खर्चको विरोधमा नेतृ साहले आफ्नो फेसबुकमा स्टाटस लेखेकी थिइन् । उक्त स्टाटसकै आधारमा उनलाई पक्राउ गरिएको जनाइएको छ ।
