जनकपुरधाम, २५ असोज। जानकी मन्दिरको सौन्दर्यीकरणका लागि बाहिरी परिसरमा लगाइएको मार्वल निर्धारित मापदण्ड भन्दा उत्कृष्ट रहेको बताइएको छ ।
जानकी मन्दिरका उत्तराधिकारी महन्थ रामरोशन दास वैष्णव समेतको उपस्थितिमा शुक्रवार आयोजित पत्रकार सम्मेलनमा मुख्यमन्त्री स्वच्छता अभियानका सिनियर डिभिजनल इञ्जिनियर भगवान झाले प्रयोगशालाबाट परिक्षण भै मात्र जडान गरिएको मार्वलको गुणस्तरमा प्रश्न उठाउन नसकिने बताए ।
‘ठेक्कामा उल्लेखित मापदण्ड विपरित कुनै निर्माण सामग्री प्रयोग भएको छैन्’झाले भने, पुरातत्व विभागले निर्धारण गरेकै मापदण्ड अनुसारको सेतो र नरम मार्वल लगाइएको छ ।
प्रदेश सरकारले पहिलो नम्बरकै काम जानकी मन्दिर सौन्दर्यीकरणबाट प्रारम्भ गरेकाले सकारात्मक रुपमा लिन उनले आग्रह गरे ।‘जानकी मन्दिरको सौन्दर्यीकरणका लागि दोस्रो चरणको कार्यपनि चाँडै थालिनेछ’उनले भने, जानकी मन्दिरलाई प्रदेश सरकारले पहिलो प्राथमिकतामा राखेर काम थालेको छ ।
राजस्थान सरकारद्वारा मान्यता प्राप्त राहुल इञ्जिनियर्स ल्योबेरेट्रीद्वारा परिक्षण गरिएको मार्वलको गुणस्तर निर्धारित मापदण्ड भन्दा बढी गुणस्तरीय देखिएको दावीगर्दै झाले भने, आशंका गर्नेहरुले जडान भएका मार्वलको परीक्षण गराउन सक्नेछन् ।
प्रदेश सरकारको सकारात्मक कार्यलाई सकारात्मक रुपमा नै सहयोग गर्न आग्रहगर्दै उनले भने, मुख्यमन्त्री स्वच्छता अभियानबाट प्रदेशमा महत्वपूर्ण कार्यहरु भइरहेका छन् ।
‘समाजमा भ्रम छर्नेहरुले राम्रा कार्यहरुलाई गलत प्रचार गरेर विरोध गर्छन्’झाले भने,प्रदेशमा भइरहेका सकारात्मक कार्यहरुको मुल्यांकन नहुँदा दुख लाग्छ ।अनावश्यक रुपमा आलोचना गर्ने प्रवृतीबाट विकास नहुने उनले जनाए ।
‘पुरातत्व विभागले केहि काम गरिरहेकोछ’ झाले भने, स्वच्छता अभियानको कार्य बाहिरी परिसरमा मात्र भइरहेकोछ ।जानकी मन्दिरको प्रतिबिम्ब समेत झल्किने मार्वलको गरिएको डिजाइनलाई पुरातत्व विभागले रोक लगाएपछि उसले निर्धारण गरेको अनुरुप नै कार्य भइरहेको छ ।
जानकी मन्दिरलाई विश्वसम्पदा सुचीमा राख्न सौन्दर्यीकरणले समस्या हुने चर्चा चलिरहेको बेला मुख्यमन्त्री स्वच्छता अभियानका सीडीई झाले चरणबद्ध रुपमा थप कार्यहरु अगाडी बढाइने जनाए ।प्रदेश २ का मुख्यमन्त्री लालबाबु राउतले जानकी मन्दिरको सौन्दर्यीकरणका लागि आवश्यक बजेटको कमि नहुने प्रतिबद्धता जनाउँदै आएका छन् ।-आजको जनकपुर टुडेमा यो खबर छापिएको छ /
