वीरगन्ज, २९ असोज। महान् चार्ड छठपर्व नजिकिँदै जाँदा वीरगञ्ज बजारको मुख्य सडकका घरधनी तथा व्यापारीहरुको मुटुमा ढुकढुकी बढ्दै गएको छ । पथलैयास्थित व्यापारी मार्ग विस्तार गुरुयोजना कार्यालयले छठपछि त्रिभुवन राजपथको गण्डकदेखि वीरगञ्ज भन्सार विन्दुसम्म सडकको मध्यभागबाट दायाँबायाँ २५–२५ मिटर सडक फराकिलो पार्ने अन्तिम सूचना जारी गरेकाले यस्तो ढुकढुकी बढाएको हो ।

त्रिभुवन राजपथको गण्डकदेखि भन्सार विन्दुसम्म सडक फराकिलो गर्दा वीरगञ्जको मुख्य बजार घण्टाघर, माईस्थान, आदर्शनगर, विर्तादेखि भन्सारसम्म करीब एक हजारभन्दा बढी घरहरु भत्किने भएका छन् । सो सरकारी अभियानलाई निरत्नरता दिने वा रोक्नेबारे अहिले वीरगञ्ज बासीबीच बहसको विषय भएको छ । यसै विषयमा आज वीरगञ्ज युवा तथा व्यापारिक सडकपीडित संघर्ष समितिले पत्रकार समेलन गरी आफू विकास विरोधी नभएको तर बाइपासलगायत वैकल्पिक सडक हुँदाहँुदै वीरगञ्जको मुख्य सडकलाई फराकिलो पारी घरहरु भत्काएमा वीरगञ्ज खण्डहर हुने चिन्ता व्यक्त गरेका छन् ।

सो समितिले सडकसँग सम्बन्धित मुद्दा सर्वोच अदालतमा विचाराधिन अवस्थामा रहेको र वर्तमान संविधानले घर भत्काएमा क्षतिपूर्ति दिने व्यवस्था गरेकाले सडक अतिक्रमण नगरी लालपूर्जा लिएर बसोबास गरेकोको हकमा सरकारको ध्यानाकर्षण हुनुपर्नेमा जोड दिएको छ ।

संघर्ष समितिका अध्यक्ष कुन्दन रौनियारको अध्यक्षतामा भएको सो पत्रकार सम्मेलनमा घरधनीहरु जवाहर गुप्ता, अरविन्द गुप्ता, भरत नेपाल, महेश चौरसियालगायतले यसप्रति सरकार सचेत नभए आन्दोलनमा जाने चेतावनी दिएका थिए । व्यापारिक मार्ग विस्तार परियोजनाले छठपर्वपछि प्रहरी प्रशासनको सहयोगमा गण्डकदेखि वीरगञ्जको मुख्य सडक हँुदै भन्सार विन्दुसम्म रहेको त्रिभुवन राजपथको सडक फराकिलो पार्ने काम शुरु हुने परियोजनाका इञ्जिनीयर अशोककुमार यादवले राससलाई बताउनुभयो । वीरगञ्जको मुख्य सडक फराकिलो नहँुदा ट्राफिक जाम हुने, दुर्घटना बढ्नेजस्ता समस्या देखिएकोले जति सक्दो चाडो सो सडक फराकिलो गर्नुपर्ने अर्कापक्षको माग थियो ।