सिबेन्द्र रोहिता/ जनकपुरधाम : कुवेतमा मृत्यूको मुखबाट बाँचेर भगवानपुर (सिरहा)का प्रमोद सदा आज घर आउन लागेका छन् । सदा कुवेतबाट नेपाली समय अनुसार शनिवार दिउँसो ४ः३० बजे काठमाडौं आइपुगेका हुन् ।
उनी १ वर्ष ९ महिना अगाडी कुवेत पुगेका थिए । त्यहाँको एक कम्पनीमा मजदुरको रुपमा कार्यरत उनी चार तल्लाबाट खसे । उनले आफुलाई मुख छोपेका एक व्यक्तिले धकेलेको बताउँछन् । तर स्थानीय प्रहरीका अनुसार उनी आत्महत्याको प्रयास गरे तर बाँचे ।
गम्भिर घाइते अवस्थामा प्रमोदलाई कुवेतका प्रहरीले अस्पतालमा भर्ना गराए । उनी करिब ३ महिनासम्म अस्पतालमा उपचार गराउँदा कसैसँग सम्पर्क भएन । उनको अवस्थाबारे घर परिवार समेत अनभिज्ञ थिए । पछि एक व्यक्तिले उनको भिडियो सामाजिक सञ्जालमा राखेपछि गैर आवासीय मधेशी संघका अन्तराष्ट्रिय अध्यक्ष बसन्त कुशवाहाले जानकारी पाए ।
अध्यक्ष कुशवाहा, संघकै कुवेतका उपाध्यक्ष फुलचन मुखिया लगायतका व्यक्तिहरु सदालाई भेट्न अस्पताल पुगे । मुखिया भन्छन्, ‘हामी अस्पताल पुग्दा उनी हिड्न सक्ने अवस्था थिएन । लामो समयपछि उनी हिड्न सक्ने भए । आज अस्पतालले उनी फ्लाइटबाट नेपाल जान सक्ने प्रमाणित गरे । अनी सबै व्यवस्था मिलाएर उनलाई नेपाल पठायौं ।’
सदा आजै काठमाडौंबाट घर फर्किने बताइएको छ । काठमाडौंबाट उनी एम्बुलेन्समा घर फर्किने संघका कुवेत उपाध्यक्ष मुखियाले जानकारी दिए ।
