टुडेखोज/ काठमाडौं : प्रमुख प्रतिपक्षी नेपाली कांग्रेसका सभापति शेरबहादुर देउवाले कोरोनाका नाममा केपी ओली नेतृत्वको सरकारले भ्रष्टाचार गरेको आरोप लगाएका छन् ।
कोरोनाले संक्रमण बढे पनि सरकारले पिसिआर परीक्षणको दायरा नबढाउने र आइसोलेसनहरू पर्याप्त नबनाएको देउवाको आरोप छ । बीपीको १०७ औं जन्मजयन्तीको अवसरमा कांग्रेस केन्द्रीय कार्यालयले बुधबार गरेको कार्यक्रममा देउवाले सरकारले कोरोनाका नामबाट पैसा भ्रष्टाचार गरेको बताए ।
उनले भने, ‘पिसिआरको दायरा बढाएको छैन । अरू देशमा अस्पताल र आइसोलेसन बनाएका छन् । नेपालमा सरकारले केही मतलब गरेको छैन ।’ सरकारले कोरोना रोकथाम तथा नियन्त्रणमा आफूहरूले दिएको सुझावअनुसार काम नगरेको उनको भनाई थियो ।
सरकारले जनताका प्रजातान्त्रिक अधिकार खोस्न खोजिरहेको आरोप पनि देउवाले लगाए । स्वास्थ्य सामग्री खरिद लगायतमा अनियमितता भइरहेको भन्दै कांग्रेसले यसअघि पनि छानबिन गर्न माग गरेको थियो ।
