टुडेखोज/ सप्तरी : मुलुकमा दलितमाथि भइरहेको निरन्तर हत्या, हिंसा र बलात्कारको विरुद्धमा सप्तरीको खड्क नगरपालिका ३, मा दलित अगुवाहरुले एक भव्य कार्यक्रम सम्पन्न गरेको छ ।
कोरोना महामारीको भन्दा यतिबेला दलित हिंसाको महामारी सयौंगुणा खतनाक रहेकोले दलितहरू आन्दोलित हुनुपर्ने बाध्यता रहेको कार्यक्रममा वक्ताहरुको तर्क थियो । कार्यक्रमको विशिष्ट अतिथि राजेश विद्रोहीलेअबको युग दलित आन्दोलन र मुक्तिको युग रहेकोले अहिले चरणबद्ध रुपमा चलिरहेको दलित आन्दोलन सांस्कृतिक आन्दोलनको सामूहिक प्रतिबिम्ब रहेको र यसको नेतृत्व दलित समुदायले गरिरहेको बताए ।
उनले थपे, ‘महामारीमा दलितहरू रोग, भोक र शोकले मरिरहेकाबेला, गाउँघरमा जिवित रहेका जातव्यवस्थाले दलितको लाचार जीवनमाथि राज्य र राजनीतिक दलले योजनाबद्ध रुपमा खेलबाड गरिरहेकोले त्यसका बिरुद्ध एकजुट भएर लड्नुपर्छ ।’
कार्यक्रमका अतिथि सप्तरी जिल्ला दलित संघर्ष समितिका अध्यक्ष प्रथमलाल रामले, दलितहरू एकजुट नभए र दलितहरू जातीको नाममा आफ्नैमा विभाजित रहे दलित मुक्तिको प्रश्नमा ठूलो धमिरा लाग्न सक्ने भएकाले एकजुट हुन र संघर्ष गर्नुको विकल्प नरहेको बताए ।
अर्का अतिथि गंगा सदाले, दलितहरु लामो समयदेखि ठगिको जीवन विताएकाले अब दलितहरू राजनीतिको फिल्डमा उत्रिनुपर्ने बताए । बद्री सदाले, महामारीमा दलितको भोकमाथि राजनीति भएको र सबै तहको सरकार महामारीको नाममा ठूलो भ्रष्टाचारमा फसेको उनले बताए ।
कार्यक्रममा सयौंको संख्यामा स्थानीय दलित र दलित अगुवाहरुको उपस्थित थियो । कार्यक्रममा दलित अगुवा रामनाथ मण्डल, सजन सरदार लगायतले पनि आफ्नो मन्तव्य राखेका थिए ।
कार्यक्रम संचालन सीयाराम पासवानले गरेका थिए भने अध्यक्षता स्थानीय जेष्ठ नागरिक रामरुप सरदारले गरेका थिए ।
