जयनाथ यादव, सिरहा । भगवानपुर गाउँपालिका अध्यक्ष उग्रनारायण यादवको लापरबाहीका कारण भगवानपुरका जनता समस्या झेल्न बाध्य बनेका छन् । उनी निर्वाचित भएपछि जनताले अब गाउँपालिकाको सेवामा सुधार हुने आश गरेका थिए, तर उनको कामबाट जनता निरास बनेका छन् ।
अहिले गाउँपालिकाका कुनै स्वास्थ्य चौकीमा औषधी छैन । समयमा खरिद प्रक्रिया अगाडी नबढाउदा औषधी अभाव भएको हो । औषधी नै नपाएपछि विरामीहरु स्वास्थ्य चौकी र अस्पताल जानै छाडेका छन् ।
गाउँपालिकाले ५ महिना अघि नै औषधी उपलब्ध गराएको थियो । अहिले स्वास्थ्य चौकीमा कुनै किसिमको औषधी छैन । सिटामोल पनि छैन गाउँपालिकासँग पटक पटक माग गर्दा कुनै चासो देखाएको छैन । अब त माग फारम फर्न पनि छोडिसक्यौं– स्वास्थ्य चौकी नरहा रिगोल, गम्हरीयाका ईन्चार्ज भोगिलाल यादवले गुनासो गरे ।
यस्तै वडा नम्बर ३ आभेनगरमा रहेको स्वास्थ्य चौकीका ईन्चार्ज धर्मनाथ यादवले उपचारका लागि आउने विरामीलाई औषधी नदिएपछि गाली सुन्नुपरेको बताउँछन् । उनले भने, ‘औषधी नै छैन । कहाँबाट दिने ? नदिएपछि गाली गाली खानु परिरहेको छ ।’
उनका अनुसार चालु आर्थिक बर्षमा औषधीको अवस्था नाजूक नै रहयो । माग अनुसार दिदैन् । यहाँ लगभग महिनामा ८० जना बालबालिका बिरामी आउँछन् । उनीहरुका लागी सिटामोल १०० माग गर्दा १० वटा पठाउँछ । भदौमा हामीले औषधी माग गर्यो । भदौंपछी थोरै थोरै गरी ३ पटक उपलब्ध गराएको थियो ।
वडा नम्वर ३ का वडाध्यक्ष विनोद यादवले औषधी अभाव रहेको स्वीकारे । उनले भने, ‘मेलै अस्ती नै स्वास्थ्य शाखाका सह–संयोजकलाई औषधी उपलब्ध गराउन भनेको थिए । उहाँ भनुभयो– माथि कुरा राखैको छु । बोर्डको बैठक बसेपछि केही हुन्छ । तत्काल हामीसँग औषधी छैन ।
औषधी अभावका कारण स्वास्थ्य चौकीहरु कार्यालयको समय अगाडी नै बन्द हुने गरेको छ । करिब २/३ बजे नै चौकी इन्चार्जहरु घर पुग्छन् । यो गुनासोपछि बिहीवार टुडेखोजको टिम आधारभुत स्वास्थ्य चौकी ठाडी पुग्दा दिउँसो ३ बजे बन्द भइसकेको थियो । त्यहाँको इन्चार्ज रामेश्वर प्रसाद यादव छन् । उनीसंग सम्पर्क गर्दा हुन सकेन ।
स्वास्थ्य चौकी इनर्वाका इन्चार्ज धर्मदेव यादवले एन्डिवाईटिक र मेट्रोन नभएर स्वास्थ्य चौकी चलाउन धौ धौ परेको सुनाए । उनले भने, ‘हामीले ३५ प्रकारका औषधी निःशुल्क उपलब्ध गराउनुपर्छ । तर २ महिनादेखी विभिन्न किसिमको औषधी छैन । स्वास्थ्य शाखाले आज भोली मात्र भनिरहेको छ ।’
स्वास्थ्य शाखा सह–संयोजक विजय यादवले असारमा खरिद भएको औषधी अहिलेसम्म चलिरहेको सुनाए । उनका अनुसार असारपछि औषधी खरिद भएको छैन । सिटामोलको समय अभाव भएको उनले पनि स्वीकारे । तर गाउँपालिका अध्यक्ष यादवलाई औषधी खरिद गर्न अझै चासो देखाएका छैन ।
