काठमाडौं । नेकपा एमालेकी सांसद सम्झना थपलियाले मधेशमा बँधुवा मजदुरका रूपमा रहेका हरवाचरवाको खाना र छानाको व्यवस्था गर्न माग गरेकी छिन् ।
प्रतिनिधिसभाको मंगलबारको बैठकमा बोल्दै सिरहा घर भएकी सांसद थपलियाले सरकारले हरवाचरवाको मुक्तिको घोषणा गरेपनि पुनर्स्थापनाको लागि आवश्यक बजेटको प्रबन्ध नगरेका कारण हरवाचरवालाई खाना र छानाको संकट परिरहेको बताइन् ।
‘गतवर्ष हरवाचरवासम्बन्धी वस्तुस्थिति अध्ययन समितिका अनुसार मधेशका आठ वटै जिल्लामा हरवाचरवा छन् । सरकारले उनीहरूको मुक्ति र ऋण तथा कागजात खारेजीको ऐतिहासिक घोषणासमेत गरिसकेको छ,’ उनले भनिन्, ‘उनीहरूको मुक्तिको घोषणा भएपनि पुनर्स्थापनाको व्यवस्था गरिएको छैन । अहिले हरवाचरवा र तिनका परिवार के खाने ? कहाँ बस्ने ? के लगाउने ? भनेर समस्यामा परेका छन् । उनीहरु हारगुहार गरेर स्थानीय र प्रदेश सरकारको ढोका ढकढक्याइरहेका छन् ।’
सांसद थपलियाले तत्कालीन प्रधानमन्त्रीले सस्तो लोकप्रियताकालागि हरवाचरवा मुक्तिको घोषणा गरेको, तर उनीहरूको पुनर्स्थापनाका लागि बजेटको प्रबन्ध नगरेको आरोप लगाइन् ।
‘आगामी बजेटमा हरवाचरवाका लागि विशेष बजेट र कार्यक्रमको व्यवस्था मिलाइयोस्, म सरकारको ध्यानाकर्षण गराउन चाहन्छु,’ उनले भनिन् ।
