सिरहा, ९ भदौं । सिरहा सदरमुकामस्थित सूर्यनारायण सत्यनारायण मोरवैता यादब बहुमुखि क्याम्पसमा प्रदेश २ सरकारको सहयोगमा निर्माणाधिन दलित छात्रावास अलपत्र परेको छ ।

समाजमा छुवाछुतका कारण दलित विधार्थीहरुलाई बजारमा कोठा खोजेर अध्ययन गर्न समस्या भइरहेको बेला प्रदेश सरकारले उनीहरुका लागि छात्रावास निर्माण अगाडी बढाएको छ । तर यतिबेला निर्माण कार्य अवरुद्ध छ भने निर्माणाधिन भवन अगाडी पानी जमेको छ ।

आर्थिक वर्ष २०७५/०७६ प्रदेश सरकारको सहयोगमा निमार्ण कार्य सुरु भयो । आर्थिक वर्ष सकेर नयाँ आर्थिक वर्षको एक महिना वितिसक्द पनि पुनः निर्माण सुरु गर्नेतर्फ सम्बन्धित निकायको ध्यान पुग्न सकेका छैन । निर्माण सामग्रीहरु लथालिङ देखिन्छ ।

प्रदेश सरकारले छात्रावास निर्माणको लागि ९० लाख रुपैया बजेट विनियोजन गरेको छ । जसमध्ये ४३ लाख खर्च भएको र ८ लाखको फनिर्चर खरिद गरिएको छ । अन्य ३९ लाख फ्रिज भएको पूर्वधार विकास कार्यलय सिरहाको ईन्जिनियर पशुपति साहले जानकारी दिए ।

बजेट फ्रिज भएपछि पुनः बजेट नआए यसरी नै अधुरो भवन रहिरहने भन्दै दलित अगुवाहरु चिन्तित बनेका छन् । उनीहरुले भवनको निर्माण पुरा गरी छात्राबास संचालनमा ल्याउन प्रदेश सरकारसँग माग समेत गरेका छन् ।