सर्लाही, १८ भदौं । ऋण दिएको चारदेखि पाँच गुणासम्म ऋणीसँग असुल्ने र असुलेपनि मुद्दा हालेर जेलसम्म पु-याउने सर्लाही मलंगवाका श्यामकृष्ण साह ‘परदेशी’ पक्राउ परेका छन् ।
उनलाई कार्वाही गराउन नेपाल कम्युनिष्ट पार्टी (नेकपा) का जिल्ला स्तरीय नेताहरुले पछिल्ला दिनमा भूमिका खेल्दै आएका छन् । पीडितहरुलाई काठमाण्डु लगी शिर्ष नेतासम्म भेट् गराउने कामदेखि न्याय दिलाउने सवालमा नेकपा नेताहरु सकृय छन् । एकातिर उनलाई केहि नेताले कार्वाही गराउने पक्षमा देखिएका छन् भने केहि नेताले उनलाई विगतमा बचाएको दृष्टान्त पनि छ ।
अहिले पनि नेकपाकै केहि नेताले पक्राउ परेका परदेशीलाई बचाउने प्रयासमा लागेको नेकपाबृत्तमै चर्चा छ । नेकपाभित्रकै दुई खेमा कार्वाही गराउने र बचाउने दाउमा लाग्दा नेकपाकै एक जना नेता परदेशीसँग पीडित बनेको तथ्य बाहिर आएको छ । पीडामा परेका ऋणीहरु खुलेर परदेशीबिरुद्व बाहिर आएपछि नेकपाका ती नेता सम्पर्कमा आएका छन् । परदेशीसँग ऋण लिएका उनले ऋण तिर्ने भाका हुँदाहुँदै तमसुककै लिखत कागजातकै आधारमा आफ्नो घर र जग्गा खिचौंला गरी आफ्नो बनाएको बताएका छन् ।
परदेशीसँग २०७२ सालमा बुवाको उपचार गराउन भन्दै २ लाख ७० हजार ऋण लिए । जग्गाको राजिनामा नगराए परदेशी ऋण दिने पक्षमा थिएनन्’ नेकपाका इश्वरपुर नगरपालिका इन्चार्ज समेत रहेका धामीले भने, “तत्काल जग्गा मेरी छोरी इलाको नाममा पास गरिदिनुस्, रकम बुझाएपछि तपाईंको नाममा फिर्ता हुन्छ भन्दै आफूले जग्गा इलाको नाममा राखिदिएको थिएँ ।’
इलाको नाममा जग्गा राखेर लिएको ऋणको व्याज र सावा तिर्दै आइरहेपनि परदेशीले छोरीको नाममा गराएको तत्कालिन बलबा सोकनाहा गाविसको वार्ड नम्बर २ ख कित्ता नम्बर २२५ को घरसहितको २ कठा ५ धुर जग्गा आफ्नो पत्नी मन्जुको नाममा गराएको पास गराएको नेता धामीको भनाई छ ।
जग्गा पास मात्र होइन् धामीसँग परदेशीले २ लाखको एक, एक करोडको एउटा र ३१ लाख २० हजारको अर्काे एक गरी तीन वटा छुट्टाछुट्टै तमसुक बनाएका छन् । ‘जालसाजी गरेर उनले मेरो घर र जग्गा हड्पेका छन्’ धामी भन्छन्, “मलाई न्याय चाहियो ।”
एकातिर परदेशीबाट नेकपाकै नेता पीडित बनेका छन् भने अर्काेतर्फ नेकपाकै नेताहरुले परदेशीलाई बचाएको देखिएको छ । परदेशीले ऋणीहरुलाई अत्यधिक मानसिक तनाव दिएपछि गत माघमा पीडित महिलाहरुको समूहले परदेशीका छोरालाई समातेपछि नेकपा केन्द्रीय सदस्य रेवती पन्तले सहमति गराउँदै उनका छोरा उम्काएको चर्चा छ ।
नेकपाका प्रदेश कमिटि सदस्य कमल बूढाथोकी पनि पार्टीका केहि नेता परदेशीलाई बचाउनेतिर लागेको बताउँछन् । तर यसले केहि फरक नपार्ने बताउँछन् उनी । परदेशीकै पक्ष लिने थोरै मात्र छन्, यसले कुनै फरक पार्देन्’ बूढाथोकीले भने ।
नेकपाका जिल्ला इन्जार्च दाताराम वाग्ले पार्टीका साथीहरुले विगतमा गराएको सहमति समस्या समाधानकै निम्ति गराएको बताए । ‘अहिलेको अवस्थामा कोहि पनि’ उनको पक्षमा जान सक्दैनन्’ वाग्लेले भने, “पीडितहरुलाई न्याय दिलाउन पार्टी केन्द्रीय कमिटिकै निर्णय भएकाले यो निर्णयबिरुद्व जाने जोकोहिलाई पनि कार्वाही हुन्छ ।”
