काठमाडौं : केही दिनअघि कोरोनाभाइरस संक्रमण पुष्टि भएका नेपाली क्रिकेटर सन्दीप लामिछाने अस्पताल भर्ना भएका छन् ।
श्वासप्रश्वासमा समस्या आएपछि उनी अस्पताल भर्ना भएका हुन् । आइतबार राति उनलाई ह्याम्स अस्पताल भर्ना गरिएको हो ।
अस्पताल भर्ना भए पनि उनको स्वास्थ्य अवस्था सामान्य रहेको बताइएको छ । सन्दीपले राष्ट्रिय क्रिकेट टोलीको बन्द प्रशिक्षणमा सहभागी हुनुअघि शुक्रबार पिसिआर परिक्षण गराएका थिए । शनिबार उनलाई कोरोनाभाइरस संक्रमण भएको पुष्टि भएको थियो ।
सन्दीप केहि दिन राष्ट्रिय क्रिकेट टिमको बन्द प्रशिक्षणमा बसेर डिसेम्बर दोस्रो साता बिग बास खेल्न अस्ट्रेलिया प्रस्थान गर्ने तयारीमा थिए ।
अब उनी कोरोना रिपोर्ट नेगेटिभ आएपछि मात्र अस्टे«लिया प्रस्थान गर्ने छन् । लगातार तेस्रो सिजन बिग बास खेल्ने तयारीमा रहेका सन्दीप यो सिजन होबर्ट हुरिकेन्ससँग अनुबन्धित छन् ।
१० डिसेम्बरबाट सुरु हुने लिगको अघिल्ला २ सिजन उनले मेलबर्न स्टार्सबाट खेलेका थिए ।
तपाईको प्रतिक्रिया