रौतहट : पेटमै चक्कु प्रहार गर्दा १८ वर्षीय युवकको मृत्यु

रौतहट : चक्कु प्रहारबाट गम्भीर घाइते भएका रौतहटका एक युवकको मृत्यु भएको छ। वृन्दावन नगरपालिका ३ का १८ वर्षीय नन्दकिशोर रामको उपचारको क्रममा: सोमवार राति मृत्यु भएको हो ।

उनका छिमेकी १९ वर्षिय रवि रामले उनलाई चक्कु प्रहार गरेका हुन् । सोमबार बेलुकी आफ्नी काकी ललिता देवीलाई छिमेकी लाले रामले मादक पदार्थ सेवन गरी गालीगलौज गरेकोमा नन्दकिशोरले पनि लाले रामकै पक्ष लिएको भन्दै भनाभन भएको थियो ।

झै-झगडा शान्त भइसकेको केही वेरमा भान्छाको चक्कुले लगेर रविले नन्दकिशोरको पेटमा प्रहार गरी गम्भीर घाइते बनाएको प्रहरी अनुसन्धानबाट खुलेको छ । प्रहरीले राति नै चक्कु प्रहार गर्ने रविलाई नियन्त्रणमा लिएको थियो ।

घाइते नन्दकिशोरलाई एपोलो अस्पताल चन्द्रपुरमा उपचार गर्न लगिएकोमा उनको गए राति नै मृत्यु भएको जिल्ला प्रहरी कार्यालय रौतहटले जानकारी दिएको छ ।

घटनास्थलबाट चक्कु बरामद गरिएको र घटनाबारे थप अनुसन्धान भइरहेको प्रहरीले जनाएको छ ।