राजविराज, २२ असोज । सप्तरी जिल्लाका पाँच वटा स्थानीय तहले सभाबाट पारित नगरी बजेट खर्च गरीरहेको खुलासा भएको छ ।
बजेट पारित नगरी खर्च गर्ने स्थानीय तहको बजेट कटौती गर्ने कानुनी व्यवस्था भए पनि सप्तरीका अझै ५ वटा स्थानीय तहले सभाबाट बजेट पारित नै नगरी खर्च गरिरहेका छन् । संविधान अनुसार सभाबाट बजेट पारित नगर्ने स्थानीय तहलाई सरकारले प्रदान गर्ने अनुदान कटौती गर्ने कानुनी व्यवस्था छ ।
जिल्लाको छिन्नमस्ता, तिरहुँत, बलान बिहुल, महादेव, राजगढ (वेल्ही चपेना) गाउँपालिकाले सभा गरेका छैनन् । स्थानीय सरकार सञ्चालन ऐन र अन्तर सरकारी वित्त व्यवस्थापन ऐनले सबै स्थानीय तहले हरेक आर्थिक वर्षका लागि असार १० गतेभित्र आ–आफनो सभामा बजेट पेस गर्नुपर्ने र असार मसान्तभित्र बजेट पास गरिसक्नुपर्ने कानुनी व्यवस्था रहेको छ ।
महालेखा परीक्षकको कार्यालयले भने सभाबाट बजेट पारित नै नगरी खर्च गर्नु बेरुजु हुने जनाएको छ ।
