कुलदिप दास ‘प्रेम’ / जनकपुरधाम, २९ असोज । विमानस्थल तोडफोड आरोपमा पक्राउ परेका राजपाका संघीय साँसद प्रमोद साहमाथि अनुसन्धान गर्न जिल्ला अदालत धनुषाले प्रहरीलाई ४ दिनको म्याद दिएको छ ।

हिजो काठमाडौंबाट समातेर जनपुर ल्याउँदा ढिलो भएपछि आज अदालतमा साँसद साहलाई पेश गर्दा ४ दिनको म्याद दिएको हो । अदालतबाट निस्किने क्रममा साँसद साहले सम्मानित अदालतले गर्ने निर्णयलाई सम्मान गर्ने प्रतिक्रिया दिए ।

अदालतमा साँसद साहलाई लग्दा सुरक्षा अवस्था कडा पारिएको थियो । उनीमाथि गैर सैनिक हवाई उडान ऐन २०१५ अन्तर्गत नागरिक उड्डयन प्राधिकरणले मुद्दा दर्ता गराएको छ । यो मुद्दामा दोषी ठहर भएमा साँसद साहलाई ५ देखि १० वर्षसम्म कैद हुने बताइएको छ ।

साँसद साहलाई रिहाईको माग राख्दै राजपा आन्दोलित भएको छ । आन्दोलनका कार्यक्रम अन्तर्गत आज विहान १ घण्टा जनकपुरको रामानन्द चोकमा राजपाले सडक समेत अवरुद्ध गरेका थिए । साथै जनकपुरमा रहेको बुद्ध एयरको सिटी अफिसमा तालाबन्दी गरेको छ ।

सोमवार साँसद साहले विमान ढिलोसम्म नआएपछि आक्रोसित भएर जनकपुर विमानस्थलमा रहेको बुद्ध एयरको काउण्टरमा तोडफोड गरेको आरोप लागेको छ ।