जनकपुरधाम : काठमाडौंको कमलादीबाट बरामद भएको भनिएको १५ किलो सुन प्रकरणमा इल्ताफ हुसेन अन्सारीलाई प्रहरीले पक्राउ गरेको छ ।
जिल्ला प्रहरी कार्यालय पर्साको टोलीले अन्सारीलाई बाराको निजगढबाट पक्राउ गरेको हो । यही साउन १३ गते कमलादीबाट प्रहरीले १५ किलो सुन बरामद गरेको दावी गरे । तर उक्त सुन भने सुन्धाराबाट बरामद गरिएको थियो ।
अचम्म त के भने १५ किलो सुन भनिएपनि आधा किलो मात्र सक्कली सुन थियो । साढे १४ किलो नक्कली सुन रहेको पुष्टि भएपछि प्रहरी नै तनावमा परेका छन् । चाँदीमा सुनको जलप लगाएर नक्कली पारिएको खुलेको थियो ।
पक्राउ परेका अन्सारी नक्कली नोटको कारोबारी समेत रहेको प्रहरीको दावी छ । भारतीय नक्कली नोटसहित उनलाई २०७२ जेठमा ललितपुरबाट पक्राउ गरिएको थियो ।
