रौतहट । सवारी दुर्घटना न्यूनिकरणका लागि जिल्ला ट्राफिक प्रहरी निरीक्षक बिमलाकुमारी कठायतको टोलीले गत साता चन्द्रपुर ९ डुमरिया चोकमा जाँच सुरु गर्यो । त्यसैबेला सदरमुकाम गौरबाट भारतीय नम्बरप्लेटको मोटरसाइकल हुइकिँदै आयो । प्रहरी निरीक्षक कठायतले मोटरसाइकल रोक्ने प्रयास गरिन् । चालक आत्तिएर मोटरसाइकल नै छाडेर भागे ।
ट्राफिकले मोटरसाइकल नियन्त्रणमा लिएर अनुसन्धान सुरु गर्यो। उक्त मोटरसाइकल चोरीको भएको पत्ता लाग्यो । केही दिनपछि मोटरसाइकलका सम्बन्धित धनी ‘मोटरसाइकल मेरो हो’ भन्दै जिल्ला ट्राफिक कार्यालय पुगे । प्रहरीका अनुसार चोरी गर्ने गिरोहले नै धनीलाई फोन गरेर ट्राफिकमा जान भनेका रहेछन् ।
भारत सीतामंढी ग्राम बैरगीनिया– ११ घर भएका मनोजकुमार साहको भारतीय बीआर ३० एए ९१९६ नम्बरको १५० सीसीको पल्सर मोटरसाइकल साउन १७ गते चोरी भएको थियो । उक्त मोटरसाइकल चोरी गर्ने गिरोहले चन्द्रनिगाहपुरतर्फ ल्याउँदै गर्दा ट्राफिक प्रहरी निरीक्षक कठायतको टोलीले जाँचको क्रममा फेला पारेको थियो । त्यसबेला फरार भएका चोरले मोटरसाइकल धनी साहलाई ुतिम्रो मोटरसाइकल ट्राफिक प्रहरीकहाँ छ गएर लिनुु भन्दै फोन गरेका थिए । त्यसपछि उनीहरु मोटरसाइकल लिन प्रमाणसहित भारतबाट बिहीबार जिल्ला ट्राफिक रौतहट आइपुगेका हुन् ।
‘चोरले नै मोटरसाइकल लिन जानु भनेर फोन गरेको सुन्दा अचम्म लाग्यो,’ प्रहरी निरीक्षक कठायतले भनिन्, ‘फोन गर्ने व्यक्तिको मोबाइल नम्बरको अनुसन्धान भइरहेको छ । यस्तो घटना बिरलै सुन्न र देख्न पाइन्छ ।’ साहका अनुसार उनको घरमा राखेको अवस्थामा मोटरसाइकल चोरी भएको थियो । उक्त मोटरसाइकल केही समयपछि चन्द्रनिगाहपुरतर्फ ल्याउँदै गरेको अवस्थामा ट्राफिकले फेला पारेको हो ।
‘हामीलाई सुरुमा विश्वास नै लागेको थिएन । चोर आफैंले फोन गरेर मोटरसाइकल ट्राफिकमा छ गएर लिनु भन्यो,’ साहले भने, ‘समयमा मोटरसाइकल चोरी गर्ने गिरोह पक्राउ गर्न सकिएन भने पछि समस्या हुन्छ ।’ साह भने आफ्नो फोन नम्बर चोरले कसरी पत्ता लगायो भन्नेमा आश्चर्यचकित छन् ।
मोटरसाइकल चोर्ने गिरोह नेपालकै भएको पनि उनको दाबी छ । प्रहरीका अनुसार साहलाई फोन गर्ने मोबाइल नम्बरको ट्रु कलरमा सतेन्दर काठमाडौं भनेर देखाउँछ । मोटरसाइकल चोरी भएपछि साहले बैरगनिया थानामा जाहेरी दर्ता गराएका छन् । भारतीय प्रहरीले पनि उक्त मोटरसाइकलको खोजी गरिहरको थियो । उक्त जाहेरी र अन्य कागजात राखेर सम्बन्धित धनीलाई मोटरसाइकल जिम्मा लगाइएको ट्राफिक प्रहरी निरीक्षक कठायतले जानकारी दिइन् ।
केही समययता जिल्लामा मोटरसाइकल चोरीका घटना बढेको प्रहरीको भनाइ छ । यस्तै प्रहरीले मोटरसाइकल चोरी गर्ने गिरोह पत्ता लगाउने प्रयास गरिरहेको पनि जनाएको छ ।
जिल्ला प्रहरी कार्यालय गौरका प्रवक्ता डीएसपी सुनिल मल्लले मोटरसाइकल चोरी गर्ने गिरोहमध्ये धेरैजसो पत्ता लागिसकेको दाबी गरेका छन् । ‘नम्बरप्लेट बदलेर चलाउने गर्छन् । केहीले अन्यलाई बिक्री गरेको प्रहरीले फेला पारेको छ,’ डीएसपी मल्लले बताए ।
प्रहरीका अनुसार गत वर्षमा जिल्लाका विभिन्न स्थानबाट ९७ वटा मोटरसाइकल चोरी भएको प्रहरीमा निवेदन दर्ता छ । चालु आर्थिक वर्षको साउनयता एक महिनाको अवधिमा मात्रै विभिन्न स्थानबाट ८ वटा मोटरसाइकल चोरी भएको जिल्ला प्रहरीको तथ्यांकले देखाएको छ । मोटरसाइकल चोरी गरेको आरोपमा ३० जनालाई पक्राउ गरी मुद्दा चलाइसकेको प्रहरीले जनाएको छ ।
