जनकपुरधाम । प्रहरी समायोजनामा संघीय सरकारले कुनै चासो नदेखाएको भन्दै मधेस प्रदेश सरकारले आन्दोलन गर्ने चेतावनी दिएको छ ।

बुधबार बिहान प्रदेशका गृह तथा सञ्चारमन्त्री भरतप्रसाद साहले पत्रकार सम्मेलन गरेर संघीय सरकारको विभेदपूर्ण रवैया देखाएको भन्दै आन्दोलन गर्ने चेतावनी दिएका हुन् ।

प्रदेश सरकारले प्रहरी ऐन बनाए पनि संघीय सरकारले लापरबाही र उदासीनताको कारण कार्यान्वयनमा आउन नसकेको मन्त्री साहको गुनासो थियो ।

‘संघीय प्रदेश ऐन, प्रहरी समायोजन ऐन पास भएको लामो समय भइसकेको छ,’ मन्त्री साहले भने, ‘संघीय सरकारले संविधानविपरीत सुरक्षाकर्मी आफ्नै मातहत राखिरहेको छ । संविधानमा प्रदेशको शान्ति सुरक्षा प्रदेश सरकारको एकल सूचीमा रहेको छ । तर, पनि संघीयताविरोधी षड्यन्त्रको कारण संघीय सरकार प्रहरी समायोजन गर्न चासो देखाइरहेको छैन ।’

२२ साउनमा प्रदेश सरकार र प्रदेशमा रहेका सम्पूर्ण दलहरूले प्रदेश प्रमुखमार्फत प्रधानमन्त्रीलाई सात दिनको अल्टिमेटम दिएर ज्ञापनपत्र बुझाउने उनले जानकारी दिए । त्यसले पनि सुनवाइ नभए शान्तिपूर्ण आन्दोलनका कार्यक्रमहरू सार्वजनिक गरेर आन्दोलनमा जाने उनको चेतावनी छ ।

आफूहरूको आन्दोलनमा अन्य प्रदेशहरूका पनि सहयोग र समर्थन रहने साहको दाबी छ । ‘संघीयताको जन्ननी मधेस प्रदेश हो । त्यसकारण पूर्णसंघीयता कार्यान्वयन गर्न प्रदेशका सबै राजनीतिक दल र जनता एकजुट रहेका छन् । अब हुने आन्दोलनमा जनताको पनि समर्थन रहनेछ’, उनको भनाइ थियो ।