सार्वजनिक मञ्चमा महिला प्रशंसकलाई चुम्बन गरेको विवादपछि चर्चित गायक उदित नारायण झा अर्को कानूनी झमेलामा परेका छन् ।

हालै उनकी जेठी श्रीमती रञ्जना झाले उनीविरुद्ध भरणपोषणको मुद्दा दायर गरेकी छन् । रञ्जनाले उदित नारायणले आफ्नो अधिकार खोसेको र सम्पत्ति हडपेको आरोप लगाएकी छन् ।

उदित नारायण सुपौल परिवार अदालतमा उपस्थित भए, जहाँ उनले कुनै पनि सम्झौतामा सहमत हुन अस्वीकार गरे । एनबीटीको एक रिपोर्टअनुसार, उदित नारायणले रञ्जना झामाथि बारम्बार पैसा लिने आरोप लगाएका छन् ।

यसअघि पनि रञ्जनाले बिहार महिला आयोगमा उजुरी दिएकी थिइन् । दुवै पक्ष यो मुद्दामा समझदारी गर्न पुगेका थिए । रिपोर्ट अनुसार, उदित नारायणले पहिले रञ्जनालाई महिनामा १५ हजार रूपैयाँ पठाइरहेका थिए पछि २०२१ मा बढाएर २१ हजार रूपैयाँ पुर्‍याइएको थियो ।

उदित नारायणले आफ्नो जेठी श्रीमतीलाई खेती गर्नका लागि एक खेत र एक घर दिएको बताएका छन् । जसको मूल्य करिब १ करोड रूपैयाँ रहेको बताइन्छ । पछि विहार महिला आयोगले पत्ता लगायो कि उदितले आफ्नी श्रीमतीलाई २५ लाख रूपैयाँका गहना र जग्गा दिएका थिए। तर, रञ्जनाले ती दुवै बेचेको आरोप लागेको छ ।

रञ्जनाले आफ्ना कानूनी प्रतिनिधिमार्फत् उमेर ढल्कँदै गएकाले अब आफ्नो श्रीमान्‌सँगै बस्न चाहेको बताएकी छन् । उनले जीवनको बाँकी समय उदित नारायणसँगै बिताउने इच्छा व्यक्त गरेकी छन् ।