एजेन्सी : भारतको गुजरातमा एक कोरोना अस्पतालमा आगलागी हुँदा ८ जनाको मृत्यु भएको छ।
गुजरातको अहमदाबादस्थित श्रेय अस्पतालमा आगलागी भएर आठ जना कोरोना बिरामीको ज्यान गएको भारतीय सञ्चारमाध्यमले जनाएका छन् । श्रेय अस्पताल कोरोना संक्रमितहरुको लागि प्रयोग हुँदै आएको छ । आगो आईसीयू कक्षमा लागेको बताइएको छ ।
आगलागीमा परी एकजना पारा मेडिकल स्टाफ घाइते भएका छन् । आज बिहान साढे ३ बजे भएको आगलागी साढे ४ बजे आसपास नियन्त्रणमा लिइएको थियो । त्यस अस्पतालको आईसीयूमा १० जना संक्रमितको उपचार भइरहेको थियो ।
अन्य दुईजनालाई भने सुरक्षित स्थानमा सारिएको बताइएको छ । अस्पतालमा ४९ कोरोना बिरामीहरू उपचाररत रहेका समाचारमा जनाइएको छ । आगलागी पश्चात फोरेन्सिक विभागको टोली अनुसन्धानको लागि पुगेको छ ।
यस घटनालाई लिएर भारतीय प्रधानमन्त्री नरेन्द्र मोदीलगायत नेताहरुले दुःख व्यक्त गरेका छन् ।
