भारतको दिल्ली विधानसभा बैठकमा पूर्वमुख्यमन्त्री आतिशीसहित आम आदमी पार्टीका २१ विधायकलाई प्रवेश गर्न नदिइएपछि हंगामा भएको छ।

विधायक तथा दिल्लीकी पूर्वमुख्यमन्त्री आतिशीले आफ्नो पार्टीका विधायकहरूलाई विधान सभा भवनमा प्रवेश गर्न नदिएको बताएकी छन् । उनले सत्तामा आएपछि भाजपाले तानाशाही प्रवृत्ति देखाएको टिप्पणी गरेकी छन् ।

सभा परिसरमा तैनाथ प्रहरीहरूले गेटमा रोकेपछि आतिशीले किन रोकेको भन्दै बहस गरेकी थिइन् । आतिशीले सामाजिक सञ्जाल प्लेटफर्म एक्समा लेखेकी छन्, ‘भाजपाका मानिसहरूले सत्तामा आउनेबित्तिकै तानाशाहीको पराकाष्ठा नाघे । आम आदमी पार्टीका विधायकहरूलाई ‘जय भीम’को नारा लगाएकोमा तीन दिनका लागि सदनबाट निलम्बन गरिएको थियो र आज आपका विधायकहरूलाई विधानसभा परिसरमा प्रवेश गर्न पनि दिइएको छैन । दिल्ली विधानसभाको इतिहासमा यस्तो कहिल्यै भएको छैन ।’

मंगलबार आतिशी र गोपाल रायसहित आम आदमी पार्टीका २१ विधायकलाई मार्सलहरूले निकालेका थिए उनीहरूलाई तीन दिनका लागि सदनबाट निलम्बन गरिएको थियो ।

२०२२-२१ को हाल रद्द गरिएको मदिरा नीतिमा क्यागको प्रतिवेदन प्रस्तुत हुनुभन्दा अगाडि यी विधायकहरूले दिल्ली विधानसभामा विरोध प्रदर्शन सुरु गरेका थिए ।

दिल्लीकी मुख्यमन्त्री रेखा गुप्ताले प्रस्तुत गरेको ‘दिल्लीमा मदिराको नियमन र आपूर्तिमा प्रदर्शन लेखा परीक्षण’ प्रतिवेदन अनुसार, यस नीतिका कारण दिल्ली सरकारले २,००० करोड रुपैयाँभन्दा बढीको घाटा बेहोरेको थियो ।

हालै सम्पन्न दिल्ली विधानसभा चुनावमा बहुमत ल्याउँदै भाजपा २७ वर्षपछि दिल्ली सत्तामा फर्किएको हो । दिल्ली विधानसभा चुनाव २०२५ मा भाजपाले ४८ सिट जित्यो भने आम आदमी पार्टी २२ सिटमा खुम्चियो ।