जनकपुरधाम : बारामा दुईवटा मोटरसाइकल आपसमा ठोक्किदा तीन जनाको घटनास्थलमै मृत्यु भएको छ ।

शनिबार राति साढे दश बजेको समयमा जितपुर सिमरा उपमहानगरपालिका १६ टाँगिया बस्ती नजिकै भएको दुर्घटनामा परि तीनजनाको मृत्यु भएको प्रहरीले जनाएको छ ।

पूर्व पश्चिम राजमार्ग सडक खण्ड अन्तर्गत प्र. २-०३-००२ प ५३३५ र विपरीत दिशाबाट आउँदै गरेको बा ६५ प २७५६ नम्बरको मोटरसाइकल ठोक्किँदा दुवै मोटरसाइकलमा आगो लागेको थियो ।

दुर्घटनामा प्र. २-०३-००२ प ५३३५ नम्बरको मोटसाइकल चालक निजगढ नगरपालिका ९ बस्ने १६ वर्षीय विकाश साह र मोटरसाइकलको पछाडि सवार उनकी फुपु पर्साको बहुदरमाई नगरपालिका ४ डकैला बहुअरी बस्ने ३५ वर्षीय सुनैना देवी साहको मृत्यू भएको छ ।

बा ६५ प २७५६ नम्बरको मोटरसाइकल चालक नुवाकोट जिल्लाको घुङताङ ३ बस्ने ४० वर्षीय टुलुराज तामाङको घटनास्थलमै मृत्यु भएको बाराका प्रहरी प्रवक्ता प्रहरी नायव उपरीक्षक गौतम मिश्रले जानकारी दिए ।