काठमाडौं । चलचित्र विकास बोर्डका पूर्वअध्यक्ष एवं फिल्म लेखक गणेश भण्डारी पुनः माओवादीमा फर्किएका छन् । आइतबार भण्डारी आफ्नी श्रीमति अनिमा बास्तोलासहित खुमलटारमा गएर माओवादी अध्यक्ष पुष्पकमल दाहाल प्रचण्डसँग भेटेर पुनः माओवादीतिरै लागेका हुन् ।

अनिमा नेकपा नेता धर्मेन्द वास्तोलाकी छोरी हुन् । द्वन्द्वकालदेखि प्रचण्ड निकट रहेर काम गरेका भण्डारी तत्कालीन नेकपामा संघर्ष चल्दा केपी ओली समूहतर्फ लागेका थिए । ओलीलाई भेट गरेर उनले फेसबुकमा ‘आइ लभ यू ओली बा भनेर ओलीसहितको तस्विर पोस्ट गरेका थिए ।

उतिबेला ओली समूहतिर लागेको भए पनि अहिले पार्टी फरक भएपछि माओवादी आन्दोलनलाई जोगाउन पुनः माओवादीमै फर्किएको भण्डारीले नेपाल प्रेसलाई बताए । ‘पार्टी एकताका सन्दर्भमा ओलीतिर लागियो, पछिल्लो समय माओवादी आन्दोलनलाई जोगाउन प्रचण्डतिर लागेको हो,’ भण्डारीले भने ।

भेटमा प्रचण्डले अब सच्चिएर माओवादीमै सक्रिय हुन अनुरोध गरेका थिए । ‘गतिशिल हुँदा कलिहेकाँही गल्ती हुन्छ। तपाईंबाट पनि त्यस्तै भयो होला । अब पहिलेको गल्ती सुधारेर सक्रिय हुनुहोस्,’ प्रचण्डको भनाए उदृत गर्दै भण्डारीले भने ।

माओवादीको केन्द्रीय सदस्य र सांस्कृतिक विभागमा रहेर काम गर्न प्रचण्डले आश्वासन दिएको भण्डारीले बताए । चलचित्र विकास बोर्डको अध्यक्षबारे भने कुनै लविङ आफूले नगरेको उनको भनाइ छ।

तत्कालिन माओवादीको कोटाबाट उनी बोर्डको अध्यक्ष भएका थिए । माओवादीले सुर्खेत जेल ब्रेक गर्दा पनि उनी सँगै थिए । उनले लामो समय माओवादी सांस्कृतिक विभागमा रहेर काम गरेका थिए ।