काठमाडौं । जनता समाजवादी पार्टी, नेपालका प्रवक्ता मनीष सुमनले सरकारले भूमिसम्बन्धी अध्यादेश तत्काल फिर्ता नलिए सरकारलाई दिएको समर्थन फिर्ता लिने चेतावनी दिएका छन् ।

काठमाडौँ आयोजित एक कार्यक्रमलाई सम्बोधन गर्दै उनले सरकारलाई दिएको समर्थन फिर्ता लिने चेतावनी दिएका हुन् । उनले अहिलेसम्म सरकारमाथिको समर्थन कायम रहेको तर यो समर्थन पनि अध्यादेशमा नै टिकेको बताए ।

उनले भने, ‘आइतबारदेखि हाम्रो तीन दिन केन्द्रीय कार्यसमितिको बैठक छ। अध्यादेश अनि सरकारको समर्थनबारे पनि निर्णय लिन्छौं ।’

भूमि सम्बन्धी अध्यादेश फिर्ता नलिए सरकारले संसद्‌मा पेस गरेको अन्य पाँचवटा अध्यादेशमा पनि समर्थन नगर्ने उनले चेतावनी दिए । अध्यादेश ल्याउने विषय संवैधानिक भए पनि हाल नियत सफा नदेखिएको उनको भनाई छ ।