काठमाडौं। सीमामा कडाइका कारण सास्ती भोग्न बाध्य सीमावारिका जनताको समस्या सामाधानमा सरकार नरम हुनुपर्ने प्रतिनिधिसभा सदस्य शिवशंकर यादवले बताएका छन्। वारिका बजारमा चरम महंगीका कारण भान्साको सामान पनि खरिद गर्न पारि जानुपर्ने बाध्यतालाई तस्करीसँग जोडेर सीमामा व्यवहार गर्न नहुनेमा उनको जोड थियो।

कमजोर आर्थिक अवस्थाले गर्दा आफ्नो भान्सासम्मको सामान वारि (नेपाली बजार)मा किन्न सक्ने अवस्था नभएर पारिको बजार जाने जनतालाई सीमामा कडाइको नाममा सास्ती दिन नहुने यादवले लहान उद्योग वाणिज्य संघले मंगलबार आयोजना गरेको एक कार्यक्रममा बताए।

‘सामान किन्न पारि जाने दुई खालका मान्छे छन्,’ सांसद यादवले भने, ‘पहिलो घरायसी प्रयोजनार्थ र दोस्रो तस्करी गर्न। तस्करी गरेर पारिबाट सामान ल्याउनेहरू देशको अर्थतन्त्रलाई कमजोर पार्ने कर छल्ने गरेका छन्। यो वर्गलाई रोक्ने स्पष्ट नीति छ रोक्नुपर्छ। तर, तस्करलाई रोक्ने नाममा आम जनताको चोलो बन्द गरिदिनु भएन।’सीमामा तस्कर र उभोक्ता (जनता) छुट्याएर सोहीअनुसारको व्यवहार हुनुपर्ने उनको भनाइ छ।

‘जनता जसले विशुद्ध घरायसी प्रयोजनका निमित सस्तोमा पारिको बजारबाट घर खर्चका लागि सामान ल्याउँछन् उनीहरूलाई अप्ठेरोमा पार्ने काम रोक्नुपर्छ,’ उनले भने, ‘तस्करी गर्नेको हकमा शून्य सहनशीलताको नीति अबलम्वन गरेर कडाइ अपनाइनुपर्छ। दुबै वर्गलाई एकै नजरले हेरेर व्यवहार गर्दा सीमानामा विवाद र समस्य आएको छ। यसलाई सहज गर्न स्थानीय प्रशासनसँग पनि आग्रह गरेको छुँ उनले भने,‘सरकारलाई पनि सोहीअनुसार निर्देश गर्न आग्रह गर्छु। तस्करी रोक्किदा वारिका व्यपार पनि फस्टाउँछ र सरकरी राजश्व पनि बलियो हुन्छ।’

नेपाल–भारतबीच सदियौँदेखिको रोटी–बेटी सम्बन्ध छ। यो कायम र अझ कसिलो बनाइनुपर्दछ। तर, रोटी–बेटी सम्बन्धको आडमा हुने अपराधजन्य कार्य रोकिनुपर्छ। पारिबाट लागूऔषधको कारोबार फस्टाएको छ। वारिबाट मदिरा तस्करीको अवस्था पनि उदेकलाग्दो छ। रोटी–बेटी सम्बन्धको आडमा यस किसिमका अपराधजन्य कार्य रोक्न पनि सीमामा सरकारले कडाइ अपनाएको उनको भनाइ छ।

सरकारले सीमावर्ती भारतीय बजारबाट एक सय रुपैयाँभन्दा बढी मूल्यका सामान किनेर ल्याउँदा भन्सार बिन्दुमा महसुल चुक्ता गर्नुपर्ने नियमलाई कडाइका साथ लागू गरिरहेको छ। सशस्त्र प्रहरीले नाका क्षेत्रमा माइकिङ गरेर सय रुपैयाँभन्दा बढीका सामानमा भन्सार महसुल अनिवार्य गरेपछि सीमामा समस्या सृजना भएको छ। सुरक्षाकर्मी र भन्सार कर्मचारीले नाकामा सामान जाँचमा कडाइ गरेका छन्। यसले सीमाञ्चलका बासिन्दाको रोटीको सम्बन्ध (व्यपारिक सम्बन्ध) मा खलबलिएको छैन। बेटीको सम्बन्ध पनि खलबलिएको छ। सीमामा तनाव भइरहेको छ। नागरिक