सन्तोष यादब/ जनकपुरधाम, २९ मंसिर । बम विस्फोटको घटनाले महेन्द्रनगर शोकमा डुबेको छ । मृतक रामेश्वर साहको घरमा दिनभर घुइचो लाग्यो । परिवारका सदस्यहरु घटनापछि बेहास् छन् । उनीहरु केहि बोल्न सकिरहेका छैन । बम विस्फोटपछि स्थानीय समेत त्रसित छन् ।

घटनापछि शनिवार दिउँसो मृतकका घर (घटनास्थल) नेकपा नेता तथा पूर्वमन्त्री रघुवीर महासेठ पुगे । उनले घटनाप्रति दुःख व्यक्त गरे । उनले घटनामा संलग्न दोषीलाई कडाभन्दा कडा कारबाही गर्न सम्बन्धित निकायसँग आग्रह गरे । उनले पीडित परिवारलाई भेटेर सान्तव्ना समेत दिए ।

बम विस्फोट भएलगत्तै नेताहरुले सामाजिक सञ्जाल फेसबुक मार्फत समेत दुःख व्यक्त गरेका छन् । समाजवादी पार्टीका प्रमुख सचेतक तथा धनुषा क्षेत्र नम्बर २ का साँसद उमाशंकर अरगरियाले समेत सामाजिक सञ्जालमा घटना दुःखद भएको भन्दै अपराधीलाई अविलम्ब कानूनको कठघरामा ल्याउनुपर्ने स्टाटस लेखेका छन् । उनले भनेका छन्, ‘प्रहरी निरीक्षकसहित तीन जनाको ज्यान जानेगरी गराएको विस्फोटले अत्यन्त दुःखी छु ।’

बम विस्फोटमा प्रहरी निरीक्षक अमिर दाहालसहित तीन जनाको ज्यानै गएपछि देशभरका मिडियाको ध्यान शनिवार त्यही घटनामा केन्द्रित रह्यो । संघीय सरकारका गृहमन्त्री रामबहादुर थापाले समेत घटना दुःखद भएको भन्दै अपराधीलाई कारबाही गरेरै छाड्ने प्रतिवद्धता फेसबुकमार्फत जनाए । तर प्रदेश २ का मन्त्रीहरु घटनाप्रति दुःख व्यक्त समेत गरेका छैन् ।

प्रदेश २ का मुख्यमन्त्री लालबाबु राउत समेत घटनाबारे केहि बोलेका छैन । उनको फेसबुक पेजबाट विभिन्न कार्यक्रमको स्टाटस र समाचार प्रायः शेयर भइरहन्छन् । तर बम विस्फोट घटनाबारे उनको पेजमा केहि उल्लेख छैन । प्रदेश २ का आन्तरिक मामिला तथा कानूनमन्त्री ज्ञानेन्द्र यादब समेत बम विस्फोट घटना विषयमा केहि प्रतिक्रिया जनाएका छैन ।

यता, क्षिरेश्वरनाथ नगरपालिकाका मेयर योगेन्द्र पजियारले घटना दुःखद भएको भन्दै छानविन गरी अपराधीलाई कडाभन्दा कडा सजाय हुनुपर्ने बताएका छन् । शनिवार घटनास्थल पुगेका उनले भने, ‘बम पड्केर तीन जनाको मृत्यु भएको घटनालाई सामान्य रुपमा लिन सकिदैन । यस्ता आततायी घटना गराउनेलाई छिटोभन्दा छिटो पक्राउ गरी कारबाही गर्नुपर्छ ।’