रौतहट : लुटपाटको आरोपमा मौलापुर नगरपालिका ३ का २५ वर्षीय राकेश राय यादबलाई प्रहरीले पक्राउ गरेको छ ।
फतुवा बिजयपुर नगरपालिका १ गम्हरियाका २३ वर्षीय नबिन कुमार यादबको साथबाट नगद ५० हजार रुपैयाँ र १ थान मोबाइल लुटपाट गरेको आरोपमा उनी पक्राउ परेका हुन् । उनलाई आइतबार राति पक्राउ गरिएको प्रहरीले जनाएको छ ।
नबिन कुमारले फतुवा बिजयपुर नगरपालिका ५ सन्तपुरस्थित आइएमईबाट उक्त नगद निकालेर घरतर्फ जादै थिए । सोही क्रममा गम्हरियास्थित नहरको नजिकमा बिआर ०५ क्यू ०३७७ नम्बरको मोटरसाइकल चालक राकेश राय यादब र मोटरसाइकलमा सवार १८ वर्षीय किशोरले नबिनको साथबाट नगद र मोवाइल लुटेर फरार भएको थियो ।
घटनाबारे जानकारी पाएलगत्तै खटिएको प्रहरीले लुटपाटमा संलग्न राकेशलाई मोटरसाइकलसहित पक्राउ गरेको छ । लुटपाटमा संलग्न अर्का व्यक्ति नगद सहित फरार रहेको र उनको पनि खोजी भइरहेको प्रदेश प्रहरी कार्यालयले जनाएको छ ।
