सिबेन्द्र रोहिता, जनकपुरधाम । जनकपुरधामको जानकी मन्दिर पछाडीमा रहेको राम–जानकी अस्पतालले फेरी एक गरिब विपन्नको उपचारमा लागेको सम्पूर्ण रकम मिनाहा गरेको छ ।
महोत्तरीको गौशाला नगरपालिका ८ बेलगाछीका रामभरोस सदाका ११ महिने छोरा सन्देश सदाको उपचारमा लागेको सम्पूर्ण रकम अस्पतालले मिनाहा गरेको हो । उनको उपचारको विल करिब ५० हजार बढी भएको थियो । तर गरिबीका कारण उनी रुपैयाँ तिर्न नसक्ने थाहा पाएपछि अस्पतालले सबै रकम मिनाहा गर्नुका साथै गाडी भाडा समेत दिएर घर पठाएको छ ।
‘चम्की रोगबाट पीडित छोरालाई लिएर अस्पताल पुग्दा कहाँबाट उपचार खर्चको जोहो गर्ने सोचेर टेन्सनमा थिए’, रामभरोस भन्छन्, ‘तर अस्पताललाई आफ्नो पीडा सुनाएपछि सबै उपचार निःशुल्क गर्यो । मेरो लागि अस्पताल सञ्चालक भगवान सावित भयो ।’
अस्पतालमा एकहप्ता उपचार पश्चात छोरा पूर्णरुपमा निको भएको रामभरोसले बताए । उनले अस्पताल सञ्चालक र उपचारमा संलग्न चिकित्सकहरुलाई धन्यवाद ज्ञापन गरेका छन् ।
राम–जानकी अस्पतालले यसअघि पनि पटक पटक गरिब विपन्न विरामीको निःशुल्क उपचार गरेको छ ।