मस्को । रुसले शुक्रबार मानवअधिकार अनुगमनका लागि स्थापित ‘ह्युमन राइट्स वाच’ लाई आफ्नो ‘अवाञ्छित’ संस्थाहरूको सूचीमा समावेश गरेको छ ।

रुसले न्यूयोर्कमा कार्यालय भएको उक्त दबाब समूहलाई आफ्नो भूभागमा सञ्चालन गर्न प्रभावकारी रूपमा प्रतिबन्ध लगाएको हो । रुसले यस निर्णयको कारण बताएको छैन ।

सन् २०२२ मा रुसमा आफ्ना कार्यालयहरू बन्द गर्न बाध्य भएको ‘ह्युमन राइट्स वाच’ले तत्काल कुनै टिप्पणी गरेको छैन । फेब्रुअरी २०२२ मा रुसले युक्रेनमा आक्रमण सुरु गरेदेखि रुसी न्याय मन्त्रालयले क्रेमलिनको नीति वा युद्धमा मस्कोको व्यवहारको आलोचना गर्ने दर्जनौँ समूहहरूलाई प्रतिबन्ध लगाएको थियो ।

विश्वभरका सेना र सरकारहरूद्वारा गरिएका दुरुपयोगको अनुसन्धान र प्रतिवेदन प्रकाशित गर्ने ‘ह्युमन राइट्स वाच’ले युद्धको बारम्बार निन्दा गर्‍यो र रुसी सेनालाई ‘उल्लङ्घनको लामो शृङ्खला’ सञ्चालन गरेको आरोप लगायो । मस्कोले आरोपलाई अस्वीकार गर्दै आएको छ ।

रुसमा ‘अवाञ्छित’ समूहको रूपमा आरोपित अन्य संस्थाहरू ‘वर्ल्ड वाइल्डलाइफ फन्ड, ग्रीनपिस, ट्रान्सपरेन्सी इन्टरनेसनल र एल्टन जोन एड्स फाउन्डेसन’ हुन् ।

यो आरोपले समूहसँग काम गर्ने वा उनीहरूलाई पैसा दान गर्ने जो कोहीलाई पनि रुसमा अभियोजनको लागि उत्तरदायी बनाउँछ ।