एजेन्सी : बिहारमा भएको विधानसभा निर्वाचनमा राष्ट्रिय प्रजातान्त्रिक गठबन्धन (एनडीए)ले स्पष्ट बहुमत हासिल गरेको छ ।

बिहारका मतदाताले तेजस्वी यादवको युवा नेतृत्वको विपक्षी गठबन्धनलाई पत्याएनन् । जनता प्रधानमन्त्री नरेन्द्र मोदी र मुख्यमन्त्री नीतीश कुमार नेतृत्वको एनडीएलाई रुचाएका हुन् ।

मंगलवार अबेर राति सकिएको मतगणना अनुसार २४३ सिटमा आएको परिणाममा सत्तारुढ गठबन्धनले १२५ सिटसहित बहुमत हासिल गरेको हो । राष्ट्रिय जनता दल नेतृत्वको विपक्षी महागठबन्धनले ११० सिटमात्रै जितेको छ ।

यो निर्वाचनमा एआईएमआईएमले ५ सिट, लोजपा र बसपाले एक एक सिट जितेका छन् भने एक सिटमा स्वतन्त्र उम्मेदवार विजयी भएका छन् । यस पटक पनि भारतीय मिडियाले बिहारमा गरिएको मत सर्वेक्षण असफल सावित भएको छ ।

निर्वाचन आयोगका अनुसार सत्तारुढ एनडीएमा रहेको भाजपाले ७४ सिट, जनता दल युनाइटेडले ४३ सिट, विकासशील इन्सान पार्टी (भीआईपी) ले चार र हिन्दुस्तानी अवाम मोर्चाले चार सिटमा जीत हासिल गरेको छ ।

विपक्षी महागठबन्धनमा रहेको राष्ट्रिय जनता दलले ७५ सिट, कांग्रेसले १९, भाकपा र माकपाले २-२ सिट जितेका छन् ।

एनडीएले नीतीश कुमार नेतृत्वका निर्वाचन लडेपनि उनको जनता दल युनाइटेडले अघिल्लो विधानसभा निर्वाचनको तुलनामा २८ सिट कम जितेको छ । मत प्रतिशत घट्नुका बावजुद भाजपाको सिट बढेको छ ।

राजद ७५ सिट जितेर बिहारको सबैभन्दा ठूलो पार्टी बनेको छ । राजदका सहयागी वाम पार्टीलाई फाइदा भएको छ भने कांग्रेसलाई क्षति पुगेको छ ।