संजय विश्वकर्मा/ लहान, १८ माघ । सिरहाको औरही गाउँपालिका २ की २१ बर्षिया रिंकु साफीको बिहेका लागि खाडी मुलुकमा पसिना बगाईरहेको नेपाली युवाहरुको एक समुहले आर्थिक सहयोग गरेको छ ।

‘मानवसेवा नै बास्तबिक धर्म हो’ भन्ने उदेश्यका साथ निश्वार्थ रुपमा कामकाज गर्दै आईरहेको सो ग्रुपले नगद २५ हजार रुपैया र लत्ताकपडा सहयोग गरेको हो । रिंकु साफि लगायत ४ छोरी र २ छोरा गरी ६ सन्तान रहेको उनका वुवा नेति साफिले बताए ।

सबैभन्दा जेठी छोरीको बिवाहका लागि ग्रुपले सहयोग गरेकोमा हर्शित हुँदै उनले भने, ‘दहेज लिनु र दिनु कानुनी अपराध हो बिना दहेजको नमुना रुपमा छोरी बिहे गरे, आफूलाई दहेज दिने क्षमता पनि छैन । गरिब र बिमारी छु । छोरा छोरीहरु सानो छ । बच्चाहरुको पढाई लेखाईको लागि पनि सहयोगी हातहरुको अपेक्षा गरेको छु ।’

आर्थिक अबस्था कमजोर रहेको नेति साफी बिरामी भएको कारण रिंकुको बिहेमा रहत स्वरुप नगद सहयोग गरेको ग्रुपले जनाए । रिंकुको माघ १७ गते शुक्रबार सिरहाको धनगडीमाई नगरपालिका ८ बस्ने जय साफी संग समाजिक परम्परा अनुसार बिबाह भएको थियोे ।

दलित समुदाय अन्तर्गत धोबी जातिहरुले रजक सेवा समाज ग्रुप स्थापना गरि सो जातिको गरिब, असहायहरुलाई बारम्बार सहयोग गर्दै आईरहेको ग्रुपका प्रतिनिधि हरेराम साफिले जानकारी दिए । मलेशिया, साउदी लगायत खाडी मुलुक गएका दलित जाती अन्तर्गत धोबी समुदायका युवाहरुले रजक सेवा समाज ग्रुप चलाईरहेको छ ।