जनकपुरधाम, १७ भदौं । अतिक्रणको चरममारमा परेको गुठी संस्थानको जग्गाको संरक्षण जनकपुरधाम उपमहानगरपालिकाले गर्ने भएको छ ।
गुठी संस्थानको स्वामित्वमा रहेको करार समाप्त भइसकेका जनकपुरधामका जग्गाहरुलाई पाइलट प्रोजेक्टको रुपमा व्यवस्थापन गर्नका लागि जनकपुरधाम उपमाहानगरपालिका र गुठी संस्थान काठमाण्डौको विच सम्झौता भएको हो । जनकपुरधाम उपमाहानगरपालिकाका मेयर लालकिशोर साह र गुठी संस्थानका कार्यकारी प्रमुख नारायण चौधरी बीच काठमाण्डु स्थित गुठीको केन्द्रिय कार्यालयमा सहमतीपत्रमा हस्ताक्षर गरिएको छ ।
नगर क्षेत्रका पोखरी तथा हाट बजार स्थलहरु मध्ये ठेक्का अवधी समाप्त भएका स्थानहरु पाइलट प्रोजेक्टको रुपमा व्यवस्थापन एवम संचालन गर्ने गरि पोखरी किनार निमार्ण, पोखरीबाट निस्कने फोहर व्यवस्थापन, पोखरी डिलमा रहेको अनाधिकृत अतिक्रमित जग्गामा वनेका घर टहरा हटाई सौन्दर्यीकरण गर्ने, हाट बजार ब्यवस्थापन, सरसफाई र सौन्र्यकरण लगायत धार्मिक ऐतिहासीक सम्पदा संरक्षणको लागि प्रचलित गुठी संस्थान ऐन,२०३३ को दफा ४६ को व्यवस्था समेतलाई दृष्टिगत गरी सहमती गरिएको हो ।
प्रस्तुत करारनामामा ठेक्का व्यवस्थागरि प्राप्त हुने आम्दानीको चालीस प्रतिसत गुठी संस्थानलाई र चालीस प्रतिसत जनकपुरधाम उपमाहानगरपालिकालाई दिइने र बाँकि बचेका २० प्रतिसत जनकपुरधामको विकास मा खर्च गरिने करारनामा उल्लेख गरिएको छ ।
गुठी र जनकपुरधाम उपमाहानगरपालिका विच भएको करारनामा सहमती पाँच वर्षको हुनेछ र करार अवधी समाप्त भएको खण्डमा दुवैको आपसी सहमतीमा अवधी थप समेत गर्न सकिने उल्लेख गरिएको छ ।
