काठमाडौं, २९ भदौं । त्रिभुवन विश्वविद्यालयको एमबिबिएसको प्रवेश परीक्षाको बाटो खुलेको छ । सर्वोच्च अदालतको अन्तरिम आदेशपछि रोकिएको एमबिबिएस प्रवेश परीक्षाको बाटो आइतबारको फैसालाले खोलिदिएको हो ।
सर्वोच्चका न्यायाधीशद्वय इश्वरप्रसाद खतिवडा र डा मनोज कुमार शर्माको इजलासले यसअघिको अन्तरिम आदेशलाई निरन्तरता दिनुनपर्ने फैसला गरेको हो । यसअघि विद्यार्थी आयुष ओझाले हालेको रिटउपर अन्तरिम आदेश दिँदै अदालतले प्रवेश परीक्षा गर्न रोक लगाएको थियो ।
भदौ २१ गतेका लागि तय भएको परीक्षा सर्वोच्चका न्यायाधीश तेज बहादुर केसीको एकल इजलासले रोक्दै सम्बन्धित सबैलाईलाई छलफलमा बोलाएको थियो । सो रिटमाथि आइतबारको बहसपछि अन्तरिम आदेशलाई निरन्त्ररता दिन नपर्ने आदेश दिएको हो । प्रवेश परीक्षा नियमसंगत नभएको भन्दै विद्यार्थीले सर्वोच्चमा रिट दायर गरेका थिए ।
विद्यार्थीले माग पूरा नभएसम्म एमबिबिएस, बिडिएस, नर्सिङलगायतका मेडिकल शिक्षाका नयाँ भर्नाका लागि प्रवेश परीक्षा हुन नदिने बताएका छन् । समितिले तोकिएको भन्दा बढी शुल्क लिने मेडिकल कलेजलाई कारबाही गर्नुपर्ने, चिकित्सा शिक्षा ऐनमा भएअनुसारको ७५ प्रतिशत छात्रवृत्तिको व्यवस्था हुनुपर्ने, साझा प्रवेश परीक्षा हुनुपर्नेलगायत ८ सूत्रीय माग राखेका छन् ।
काठमाडौं विश्वविद्यालय, बिपि कोइरला स्वास्थ्य विज्ञान प्रतिष्ठान, पाटन स्वास्थ्य विज्ञान प्रतिष्ठानको डिन कार्यालयमा समेत उनीहरूले तालाबन्दी गरेका छन् । आइओएमा र पाटन स्वास्थ्य विज्ञान प्रतिष्ठानमा भदौ २१, २२ र २३ गते एमबिबिएसको प्रवेश परीक्षा तोकिएको थियो ।
– थाहा खबर
